anquanto i nó // entretanto

inda un die hei de fazer poemas

cumo quien arquiba l mundo, 

puostos bien al modo para chubir cumo scalada, 

oupidos, dreitos, para serbíren de caiato, 

çumentos para atamáren ciertas sedes, 

i al meio ls pochos de l mundo botáren sou oulor, 

pedrica a poner mais firme la casa adonde moramos: 

anquanto i nó,

bou daprendendo las palabras

i l oufício

de las lhebar alhá de sou sonido,

sou zalento, sou zatino, 

até paráren de ouliar l sou delor,

mal cuntentas de queréren mais que son

//

ainda um dia hei de fazer poemas

como quem arquiva o mundo,

postos bem ao jeito para subir como uma escada,

erguidos, direitos, para servirem de cajado,

sumarentos para matarem certas sedes,

e no meio dos podres do mundo deitarem seu odor,

pedrinha a deixar mais firme a casa onde moramos:

entretanto,

vou aprendendo as palavras

e o ofício

de as levar além do seu som,

seu desalento, seu desatino,

até deixarem de uivar a sua dor,

descontentes por quererem mais que são

bibir - único dius que merece tue nobena // viver - único deus que merece a tua novena

tenies un delor al lhume
pa te serbir d'almuorço,
agre prefume
que te cunsume
i faç dezir: yá nun paga la bida l sfuorço...

cheguei
i tireste me la gana de poner la mesa
adonde deixar la risa que purparei
i te lhebei
para subremesa

na fin, de l que te lhebei, yá solo palabras
me sobrórun,
mas outro almuorço nun sperabas:
tues falas si éran cumo pedradas,
mas tous uolhos nunca anganhórun

an palabras, podies fazer reboluçones
i todo achegar a la pena
de ti, mas, sien cundiçones,
quedaba te inda, alhá d'oupeniones,
bibir - único dius que merece tue nobena

nien sabes cumo aguanteste
tantos dies, tu a quien nunca nada
- nien ourdenado nien subsilho -
te tirórun: solo la bida recebiste i de strobilhos
siempre fuste rica i neilhes spabilada

deixa me la subremesa para un die
de manhana, que siempre falta mos faç:
hoije nien palabras para atirar tenies
puis bien sabies
que nunca dízen de quei tu sós capaç



//


tinhas uma dor ao lume
para te servir de almoço,
ácido perfume
que te consome
e faz dizer: já não paga a vida o esforço...

cheguei
i tiraste me a vontade de por a mesa
onde colocar o riso que preparei
e te levei
para sobremesa

no fim, do que te levei, apenas palavras
me sobraram,
mas outro almoço não esperavas:
era tuas falas pedras que atiravas,
mas teus olhos nunca enganaram

em palavras podias fazer revoluções
i tudo aproximar da pena
de ti, mas, sem condições,
restava-te muito além das openiões,
viver - único deus que merece a tua novena

nem sabes como suportaste
tantos dias, tu a quem nunca nada
nem ordenado nem subsídio
te tiraram: somente a vida recebeste e de empecilhos
sempre foste rica e neles desenrascada

deixa me a sobremesa para un dia
de amanhã, que sempre falta nos faz:
hoje nem palavras para atirar tinhas
e bem sabias
que nunca dizem do que tu és capaz

Eilegie de Ivan Ilitch // Elegia de Ivan Ilitch (II)

muorte:
solo un sfergante na punta
d'adonde s'acaba la bida;

miedo que lhebamos 
to la bida i an nuosso cuolho 
se muorre;

bida (outra)
que mos nace quando esta 
pa reinar yá nun ten fuorças;

çque mos la dou cumo ua frol
nunca para de chamar l mundo:
apuis seremos


tierra
auga, arble, granico ou aire,
que ten suidades de nós;

naquel sfergante derradeiro
mireste al para trás i to la bida
biste:

esse sfergante
ye solo l outro prato de la baláncia 
a anquelibrar ua bida a spera del. 



//


morte:
apenas momento na ponta
de onde termina a vida;

medo que levamos
toda a vida e ao nosso colo
morre;

vida (outra)
que nos nasce quando esta
para viver não tem já forças;

desde que no-la deu como uma flor
não mais para de chamar o mundo:
depois seremos

terra
água, árvore, grãozinho ou vento,
porque tem saudades de nós;

naquele momento final
olhaste para trás e toda a vida
viste:

esse momento
é apenas o outro prato da balança 
a equilibrar uma vida à espera dele.

lhénguas

nun cáben na proua,
por sede de poder cómen
las pequeinhas: lhénguas.

bénen ende bárbelos! / estão a chegar os bárbaros!

[cun ua dénia a Cavavfis]

traien guapas purcentaiges ne l queixilho de l feturo, denheiro an frol i un fado de çprézio que sabien, un solo an sue trindade éran, i un lhargo ambierno ne l mirar le ardie: l gajeiro na gábia de la cidade nien chegou a boziar: bárbelos de frente!

//

[Com uma vénia a Cavafis]

traziam belas percentagens no caixilho do futuro, dinheiro em flor i um fado de desprezo que sabiam, na sua trindade eram só um, i un longo inverno no olhar lhe ardia: o gajeiro na gávea da cidade nem chegou a gritar: bárbaros à proa!

ourtonhas // outonas

tou sentir ye un riu 
de rábia, soledade bruas:
de ti cais, ourtonhas...


//

teu sentir é um rio
de raiva, solidão ruges:
de ti cais, outonas...

Eilegie de Ivan Ilitch // ELegia de Ivan Ilitch (I)

bai se la muorte anfrisgando
nas benas de ls dies; talbeç
las alas de l bibir gánhen
cada die: mas tu nien bés

que chubes essa scaleira
cunsante baixando bás: 
muorres te anquanto bibires,
bibes porque a morrer stás


//


vai a morte penetrando
do dia as veias; talvez
as asas do viver ganhem
cada dia: e tu nem vês

que sobes por essa escada
conforme descendo vais:
morres enquanto viveres,
vives se a morrer estás

dás buoltas // dás voltas

ábren se clareiras

de selombra, brúan rius

na cama de l suonho

i nien palabras s'achégan:

dás buoltas; sien sonheira

//

abrem-se clareiras

de sombra, rugem os rios

no leito do sonho

i nem palavras te ocorrem:

dás voltas: pesadelo

bás

bás de mano dada cul miedo, mundiada alantre,
ls pies nas duras piedras de ls puntones,
que assi mais sintes da dureç de la bida

atrabessa, anque mais fácele fura deixar te ir,
i busca de l outro lado quien te quier bien, 
que ye adonde cuorre l sangre i s'upe l sol

regas la soledade nuite fuora
que ten tue raiç andeble de rejistir:
manhana spera te i mais bal que le guardes
ua risa para ambrulhar l delor que hoije sós


//


vais de mão dada com o medo, enxurrada adiante,
os pés nas duras pedras das poldras,
pois melhor assim sentes da vida a dureza

atravessa, embora mais fácil fosse deixares-te ir,
e do outro lado procura quem te quer bem,
que é onde corre o sangue e o sol se ergue

regas a solidão noite fora
pois a tua raiz fraca tem de resistir:
amanhã espera-te e mais vale que lhe guardes
um sorriso para embrulhar a dor que hoje és

zatino

bela a arder na nuite,
son canseira que te çcansa,
son zatino: lhibros!

silenço i rábia

oupiu se un silenço
parados braços de rábia:
grebe giral ye.

la metamorfose de las scaleiras an sue soledade

para que sírben uas scaleiras
se naide por eilhas chube,
naide por eilhas abaixa i la piedra
yá solo al aire de la rue ouferece 
sou zgranar sien passos que l'alísen?

guapas mais que nunca an sue soledade,
cumo todo l que nun sirbe para nada
camínan para l'eisséncia d'arte:
puoden ls uolhos sentar se neilhas
i ser bencidas por eimaginairos passos.

tengo le rábia a esta forma de arte
an que l tiempo me debuolbe
búltios que aguardában l nacer de l sol:
bien las quiero ber cumo scaleiras,
mas solo cristales de tiempo se m'assóman.

bózio

bózio de selombra 
upe al cielo ls braços znudos:
cruç guarda l camino.

gilada

lhágrimas nas fuolhas
na manhana al sol relhúzen:
derrite gilada

eimbierno

achega se al pelo
la niebe: bate a la puorta
eimbierno sien tiempo.

fuolhas

muorren se cun risas
i un fuogo de mil quelores:
fuolhas ne l outonho.

relhúzen

relhúzen de l sal
ou de dureç de l camino?
lhágrimas s'assóman.

ye l feturo un tiempo berbal?

usa mui pouco feturo l mirandés:
an beç de 'eirei',
mais quier 'hei de ir'.

quei ténen ls tiempos de ls berbos
a ber cula bida de quien ls usa?

que priessa anubra ls dies de manhana?
que agonie se albanta de hoije, an cada die?

mira a ber, 
nun te troque l berbo ls tiempos:
nanhue cunjugaçon te poderá sacar de ti:
sigue na bena de quien sós,
mas de ls cunhos nunca ls uolhos tires.

nun ténen alas ls anjos de ls mercados

hai dies an que te bates a la puorta
ou un sonido speras
pul buraco de la fechadura
zupia te l bruido de la rue
mas solo l silenço oubes:

ben te uas bezes nas palabras
an uolhos perdidos outras
ou ye solo un resfuolgo al loinje
cumo quando an nino t'arrimabas
al bruar de ls puostos de l telifone

tornas a casa i a las palabras
tardies, talbeç als recebolhos
de tantas bendímias a que nun fuste:
staba todo dreito menos tu que
drobado caminabas par'outra manhana.

nun ténen alas ls anjos de ls mercados
i scassos son ls passaportes pa sou cielo
a la punta de riba de la nuite:
nunca florirá la cotaçon adonde l'ourbalheira
nunca ls bózios secos deixe.

Nunca l mar

Nunca l mar, Fiama, fui tanto cidade
que se cruzáran a tue puorta nuossos barcos.

Nunca l mar, mas antes la maré tan acerca de
ser outra, l mundo quadrado de einabegable.
Apuis l amor benir a dar a la cuosta i apegar se al
tou cuorpo de ilha cumo abrir se la boca.

L'eimaige strourdinaira que sós tu,
nunca l mar, Fiama,
al antrar pul'auga, rasgar l aire i abraçar l riu.
Haberie un dius nas lhinhas apertadas, 
cabalhos de l diabo an bolo raso porriba l'auga,
la pormessa de star arrimada an ti.

Cumprido que esse riu fura, eiqui antre ls outros
todo agora sinte la tue falta:
rebuolben se las óndias anriba ls tous uolhos, la tue boç faç
arrebentar ls uossos i sobra un retombo tembrando ne l cuolho
de la pormessa que fui you, Fiama.

Nien tanto al mar nuossos barcos
que son un segredo cumo se fúran miedo
i nós tan pouco neilhes que deilhes nun fazimos morada.
Nien tanto a la tierra tou coraçon a andar al para trás.

Nun mais screbir l barco, Fiama,
que esse tou mar de páixaro nun sirbe para bolar.
queda te pul cuorpo de ilha, ampurrando cuosta,
correndo la cidade, falando an tateç de lhuç
als nabegantes l tou farol biográfico, ourgente,
antencional.

Nunca l mar, Fiama. Antes auga de adonde
birdes chober mius suonhos.

Antes l mar bisto ser pouco pa la mie sede
i ne l miu peito de achegar arder la squina de óndia de 
salida. I l'auga caier neste anglo tan purfeito
an que oubo assoprar un outro aire
cuntinental.

Minês Castanheira, Nunca o Mar [2012]
Traduçon de Fracisco Niebro



[an pertués:

nunca o mar. Fiama. foi tanto cidade
que se cruzassem à tua porta nossos barcos.

Nunca o mar, mas antes a maré tão perto de
ser outra, o mundo quadrado de inavegável.
Depois o amor vir dar à costa e contagiar o
teu corpo de ilha como um bocejo.

A imagem extraordinária que és tu,
nunca o mar, Fiama, 
ao largar o ferro, rasgar o vento e abraçar o rio. 
Haveria um deus nas linhas apertadas,
libelinhas em voo rasante sobre a água,
a promessa de estar ancorada em ti.

Cumprido que esse rio fosse, aqui entre os outros
tudo agora sente a tua falta;
voltam-se ondas sobre os teus olhos, a tua voz faz
rebentar os ossos e sobra um eco vibrando no colo
da promessa que fui eu, Fiama.

Nem tanto ao mar nossos barcos,
que são um segredo como se fossem medo
e nós tão pouco neles que deles não fizemos morada.
Nem tanto à terra teu coração às arrecuas.

Não mais escrever o barco, Fiama.
Que esse teu mar de pássaro não serve para voar.
Fica-te pelo corpo de ilha, empurrando costa,
batendo a cidade, falando em gaguejos de luz
aos navegantes o teu farol biográfico, urgente,
intencional.

Nunca o mar, Fiama. Antes água de onde
virem chover meus sonhos.

Antes o mar avistado ser pouco para a minha sede
e no meu peito de chegar arder a quina da onda de
partida. E a chuva cair neste ângulo tão perfeito
em que ouço soprar um outro vento
continental.]

amportanças

nunca acabas de daprender 
l que ye amportante:
siempre te squeces que nada
te puode quedar alhá la bida.

nace te un outro die

quédan sien fin las bistas
quando t'achegas a la prainada.

yá nun starás
de l outro lhado la puorta
i nada mais que suonho
para almuorço quedará.

sigues las sacaleiras
serenas de lhembráncias
alheno al oulor pocho
que s'agarrou a la risa de ls dies.

nace te un outro die
i achegou se te la muorte mais un passo,
mas bibes i bibes i bibes
acontra las puortas adonde
inda nun perdiste gana de bater.

SALIMIENTO

ya m'eirei outra beç

yá m'eirei outra beç
i caminarei por zertos i por zastres
i por lheituras zasperadas i citaçones,
antre palabras, sien naide rial que m'aspere i m'abra la puorta.

la cena sfriará se na mesa,
ls mius lhibros zasperaran
i nun haberá sentido que los cunfuorte
i l miu nome, se tubir un nome, nun me respunderá.

Assi i todo un filo de tiempo ou un filo de sangre,
ou antoce algo inda menos ampalpable,
l que se fui i l que quedou bolbendo un al outro
por sanjas sien fin i suonhos zafigurados,
ousentes un de l outro, zaparecendo un ne l outro
cumo s'acaba l'auga al fondo un poço

Manuel António Pina
Como se Desenha uma Casa
Traduçon de Fracisco Niebro



[an pertués:

Em breve partirei de novo
e caminharei por desertos e por desastres
e por leituras exasperadas e citações
entre palavras, sem ninguém real que me espere e me abra a porta.

O jantar arrefecerá na mesa,
os meus livros desesperarão
e não haverá sentido que os conforte
e o meu nome, se tiver um nome, não me responderá.

E no entanto um fio de tempo ou um fio de sangue,
ou então algo ainda menos palpável,
o que partiu e o que ficou regressando um ao outro
por galerias intermináveis e sonhos desfigurados,
ausentes um do outro, desaparecendo um no outro
como se esgota a água no fundo de um poço.]

para adonde eiremos nós?

anque Heiraclito nunca tubira eisistido,
demudarie l'auga de l riu: inda bien, pa
nun quedar puorca para siempre; aquessa ye 
filosofie bastante para aguantar las
mundiadas de zgrácia por adonde estes dies 
cuorren: tamien nós demudamos, mas a tanta 
poluiçon rejistiremos, que mos mata,
se nunca naide demudou la muorte an bida?

cuorre l'auga de l riu a dreitos a sou mar:
para adonde eiremos nós, de todo robidos,
anquanto mos ambentamos un mar nuosso,
facas oupidas an bandeira a cada squina?

la casa sós tu cuntigo

staba de pies la casa,
mas solo un sbarrulho bien tous uolhos:
nun chegueste a antender que
ua casa nun son paredes, quartos, mobles,
puis esso nun passa d'eidefício:
la casa sós tu cuntigo i 
ye a ti que te bés quando la miras.

atualidade de Platon

bibes outros mundos,
i sonhas ls berdadeiros:
spertar ye un delor.

outonho

bou me purparando para
outros amarielhos i burmeilhos:
bai me crecendo l outonho

ua cierta mordesquina

cuordas d'auga prendírun la streilha de l cielo, pardo cumo un delor, i tu pequerrico an pinga d'auga sien chegares a saber que termienta te chobiu nien stares al modo para filosofies que solo sírben para te anfernizar ls dies; de bielho, fuste zaprendendo l bolo, yá sien fuorças pa las corrientes d'aire, i chegueste al cumpleto antendimiento de la soledade houmana, anque yá muitá çcunfiasses que naide te poderie baler, ne l eissencial naide mos puode baler; squeces te muita beç de cumo sós un fuzible na cadena de l tiempo i de la stória, i esso nun depende de ti, mas de ls que antes benírun ou apuis de ti han de chegar; miras tue semiente i neilha sós capaç de arrecular até al ampeço i chegar a la fin de l mundo, mas pones de lhado la mordesquina de l pensar nessas cousas, agarrado a las seinhas de l que nace, crece i se muorre, certezas de que todo cuntina apuis de ti: ua yerba, un aire, ua quelor de las nubres, un páixaro, ls brugos a arrepassar las berças pa la Cunselada, ls redadeiros morcones, l aburmelhar de las fuolhas de la parreira i l boubo oulor de l majaricos que nun páran sou retombo nas narizes - essas i tantas outras son las berdadeiras seinhas de bida a que te agarras, que te agárran, i esso te habie de bundar, mas nun chegas a antender cumo te atíran siempre zamparado para alhá deilhas.

cumbibenças

staba la fuonte anrebulhada
nua nubre negra de lhodo
i la sede a ouliar an sou zaspero

a soutordie era l'auga clarica 
un speilho i un cumbite a afogar
sedes i a rucecitar narcisos

al fondo era ua cama agora 
l lhodo ambelesado cula moda
de músicas a beilar porriba l'auga

cumo le duol a las alas l pousar sereno de ls páixaros

nun te diç l speilho cumo demudeste
alhá de l pelo rúcio, de las angúrrias
ou de l baço de ls uolhos

nun puode la máquina desse tou mundo
traier te al tiempo atrás an que eras
outro que agora te quieres

nun sabes se inda te sírben ls sítios
que çcalceste un die, puis nadas nun dan
para anchir uocos

furas capaç de slubiar debagarico puls dies
sabendo que afazer se un a el mesmo
milagre ou mistério puode ser

nien te dás de cuonta de cumo le duol
a las alas l pousar sereno de ls páixaros
an campo raso de tierra znuda

se tubires que ambentar ls cunhos
i la bena de l'auga, esso ye seinha
de que puode (re)passar tou riu

tiempo de quedar spierto

quando la nuite ye mui scura
i ls uolhos nada béien alhá deilha
todo mos puxa para acunhar ls uolhos i drumir:

ye tiempo de quedar spierto,
outro modo nun hai de rejistir.

milagre de caganeira

fálan mal deste paiç
i desta (sue) giente
i quédan de fuora:

cumo son capazes
desse milagre
de caganeira

i quedar lhimpos?

biaijes i ua cierta 'poligamie'

yá nun ténen cuonta las biaijes que fiç de lisboua a sendin i al alrobés: tengo pena de nun las haber cuntado zde l tiempo an que tardaba un die anteiro a chegar; sei bien que la purmeira fui l die 16 de júlio de 1973, stában se me ls binte i dous anhos quaijeque a acabar, i l camboio inda botaba fumo antre l pocinho i dues eigreijas; assi i todo inda un die me hei de dar al trabalho de las cuntar, i pula cierta nun me bou a anganhar muito; i todo esto porque hoije (30.09.2012) fiç mais ua dessas biaijes de buolta a lisboua: todas juntas yá han de somar muitos dies ou semanas, talbeç meses, you sei alhá; quedo cula eideia de que zde ua cierta altura passei la bida a biajar, siempre cun l sentido nun outro lhado, preso a las dues puntas de la biaije, mas un die balerá la pena pensar subre ls sítios por adonde fui passando i de cumo todos esses sítios tamien me fúrun fazendo, mas esso quedará para outra beç: agora solo quije registrar la benida desta nuoba biaije, talbeç para atamar l bózio de ls uossos molidos, talbeç por nun saber respunder de que tierra sou puis, an matéria de tierras, sou cada beç mais 'poligámico': al modo que fui andando, fui quedando repartido por muitos sítios i muitas gientes i yá nun sou capaç nien quiero ajuntar ls cachicos todos nun solo sítio ou pertencer a ua sola giente.

un telar de silenço

ye l silenço ua nubre que te anselombra,
adonde nun te dá la gana de falar cun naide,
bés las casas, ralos tratores que pássan
i las bendímias a rebuscar l berde pulas lhadeiras

las palabras ándan atrecidas cun estes purmeiros frius
i metes te por rues adonde
nun tengas de las colgar dalgun mirar
i l silenço acaba por se te colar als dientes
cumo inda nun lhabados apuis
ua nuite de bino i de cumbersa

i deixas te star,
até que acabe de spertar la manhana
cumo madrugada na cama
cun un demingo d'auga a cantar na rue
l berano tan cansado yá
sien fuorças para ancarrapitar pula calor
i ls pardales cun sou pio arrecolhido:

parece que l mundo quijo quedar todo al miu son
anque l'aldé nun saba nien querga saber que stou porqui:
spero la hora de bolber
i outra beç antrar pula puorta
adonde todo puoda sonhar i ambentar
essa aldé que als poucos me fúrun lhebando
mas adonde siempre cuntino a sperar por mi

método

faç por resolber un porblema de cada beç: nó porque te seia mais fácele resolbé-los ou até que los cunsigas resolber, mas se fúren muitos ancraba-te la cabeça i ende nanhun serás capaç de resolber.

pelegrinaçon pulas arribas de l Douro

para Alcides Meirinhos

ls galhos de las oulibeiras 
abanában ls brincos de las azeitunas 
an sou baile cula música de las fuolhas;
al loinje l Douro era solo un speilho
pardo cumo l caier de la tarde:
la peinha adonde me sento,
nas arribas, ye un altar
deste cielo que nunca acabo de çcubrir;
l outro lhado ye solo raia
ne ls manuales de stória i na lhembráncia 
de las armas de guardas i carabineiros,
peitoril de jinela adonde ls uolhos çcánsan
an busca d'algun búltio que abaixe,
talbeç pantasma de D. Miguel de Unamuno,
zasperado culas palabras 
para dezir esta natureza
que al mesmo tiempo abraça i mete miedo;
ls purmeiros figos 
yá ls páixaros ls lhebórun,
mas l oulor, esse queda i bonda
para chamar l tiempo que guardemos,
lhibre de fames i canseiras;
quantos dies seran percisos para 
esse pelegrinar por carreirones, 
patacones, bielhos castros i capielhas,
ler l sudor que miles de anhos 
ancundesórun nas piedras,
an angúrrias de niebros, carraqueiras, 
fedieiras, cemaqueiras?
nun ten fin l camino de l spanto,
nien nunca saberemos cumo meter 
ne ls uolhos bistas tales:
hei de bolber siempre, 
cula cumpanha cierta,
un pesado silenço por caiato
i ua gana de nino que nunca se farta
de ber, oubir, andar, sentir
to la renda que l tiempo fui fazendo
nas patrielhas de prata,
to ls bózios que s'agarrórun 
al tuoro delorido de las oulibeiras,
la solidon de las piedras
que nien santas ouraciones
fúrun capazes de salbar
i solo a silenço se manténen.

lhastro

porquei nun fáltan capitanes
quando s'afunda l barco? 
talbeç puodan scolher 
quien s'ha de botar al fondo
l lhastro a botar fuora

cumbite

bamos an busca dun paiç perdido 
an sous remissacos de delor
i talbeç áchemos alguien 
que nun querga tener rezon i 
al menos un erro haba feito çque naciu

paixarinas de sonido

deixei que la música me ajudara 
a nacer outra beç: son agora ls sonidos
paixarinas que tínhen l aire cun sues alas.

pregunta i sues repuostas

dius: queda me la pregunta  a arrepassar ls dies, mas aqueilha repuosta - que son remiles de repuostas an miles de anhos - solo me sirbe para saber que siempre eisitiu la pregunta i siempre muitos deilha quejírun bibir, oupindo aliçaces de miedo, d'anfámia, de zgrácia i de delor. 

chegórun las purmeiras augas

passou pula floresta i pisou
l outonho mesmo a ampeçar a abrolhar
chegórun las purmeiras augas
i era l suolo ua sementeira 
de feitiços que muitos ténen por cousas muortas:
fuolhas, morgaços, fruitos secos caídos,
ou roques i ua ourtonhice a assomar se

antes de séren tierra i stierco
eilhi quedórun serenos nun adius
al cielo que la folhaige nunca le deixou ber
la música que fazien ambaixo ls pies
éran ua mistura de requiem
i de bida a arrebentar
antre l que caminaba para un stado pocho

ye esse l mistério: 
todo l que se muorre ye siempre 
outro algo que se purpara pa nacer
mas somos cúrtios de mais
para ende oubir l'aternidade
tan ciegos que nun bemos
alhá de nuossa fin

son de miedo ls tiempos

son de miedo ls tiempos
[yá de nino ls scamugie cun bózios]

bou cerrando las puortas ua a ua
mas arrepássan piedras i até suonhos

son las nuites mais cúrtias i mais brancas:
an que cinza ls anterrarei?

silenço outra beç

hai silenços que son feitos de lunjura
paredes que upes contra las airaçadas
auga cun que apagas l fuogo que te queima