domingo, 8 de março de 2009

tardes amazónicas


ls pais deilha nun quejírun que se casasse cun el, que era probe porque tenie un palmo de tierra a menos: cunta-se que se scapórun al meio dua nuite a fin de segada, a agarrar l camboio de la manhana, que salie d'Ougariç inda antes de l sol ampurrar la nuite pa sous miedos; naide sabe cumo chegórun al Brasil, que puli fúrun bistos muito tiempo apuis; nunca mais tornórun nien rezon deilhes alguien dou; cúntan que, yá de bielhos, se sentában a la selombra de las tardes amazónicas a falar nua lhéngua stranha: naide nunca le preguntou quei falában, cun miedo de derramar la felcidade que se le assomaba als uolhos.




2 comentários:

Anónimo disse...

Amadeu
GUAPO, GUAPO!
You conheço ua stória asparcida, mas sólo un deilhes fui pa l Brasil e era bien más arrebuscada...

Beisico

Amadeu disse...

Adelaide,

Son tantas las cuontas aparecidas a essa... que nien sei cumo inda hai mundo... l que mos bal ye que las pessonas - nós tamien - ténen ua capacidade sien lhemites para le dar la buolta a las situaçones. La mimória ye la faculdade houmana que mais se deixa prender a ua argolha a la puorta de casa...cumo ls burros.

Beisico