pregunta 77

se quieres ua respuosta, portquei preguntas?

pregunta (76)

solo haber bisto l mar pula purmeira beç als zanuobe anhos tenerá algue anfluença ne l mirar?

pregunta (75)

hai giente que passa ls dies a tratar este paiç cumo l pior de l mundo: yá que nun se ban ambora, nun serie buono que fazíran algo para el quedar melhor?

pregunta (74)

porquei poniste l diospireiro se nun sperabas quemer le ls diospiros?

pregunta (73)

até adonde, até quando ye possible remar contra la corriente? nun será até que haba fuorças para remar?

pregunta (72)

porque será que ciertas pessonas nun son capazes de mirar l speilho de l'auga sien traier arriba l lhobo que s'acamou ne l fondo?

pregunta (71)

se puodes bibir na dúbeda, para quei certezas que te puoden matar?

pregunta (70)

se nada se cria i todo se streforma,
se nesta altura ándan a sacar denheiro a muita giente
i se l denheiro nun zaparece i solo muda de bolsos,
para que bolsos stá a ir l denheiro sacado a tantos?

pregunta (69)

a que mundos mos ata la cuorda de la bida?
até adonde podemos cortar la cuorda que mos ata als mundos que fazimos?

pregunta (68)

para bibir perciso de quemer: quantas muortes (seia de plantas ou animales) essa palabra nun arrastra cun eilha... quien puode bibir sien muorte?

pregunta (67)

quantos se morrírun antes de mi para que you tubira campo?

pregunta (66)

muita giente, apuis de muorta, quier le scapar a la tierra:
nun ye un modo de querer negar la sola eiternidade que mos toca?

pregunta (65)

porquei fugimos de star solos, se mos custa tanto a aguantar cumpanhie an paç por muito tiempo?

pregunta (64)

porque rezon nun bonda bibir, mas siempre buscamos rezones para bibir?
porquei muita giente nun sabe que ua sola risa bal ua bida i dar algo a alguien ye pedamiego que bonde para assentar sous aliçaces?

pregunta (63)

porquei ténen ciertas pessonas de falar de l acerto de l mundo se solo anténden de zacerto?
porquei ciertas pessonas se dan cumo oufício pedreiro quando solo sáben sbarrulhar?

pregunta (62)

quei buscas quando buscas, se achar deixou de ser amportante?

pregunta (61)

ye de cada andar defrente l sonido: quei dízen ls çapatos nas piedras de la calçada, cumo tal a la pertuesa? ou será de las piedras la fala?

pregunta (60)

se l cielo fura assi un sítio tan buono, porquei se scaparien ls diuses pa la tierra?

pregunta (59)

quien poderie saber quantas camadas mos fazírun, quanto puolo mos amassou, por que caminos andubo la cultura que la nuossa eignorança cuida que mos naciu a la puorta, pura cumo l'auga fresca dua fuonte?
nun será muita beç essa eignorança l pedamiego adonde asséntan saberes uocos, argulhos anfantiles, fundamentalismos peligrosos?

pregunta (58)

se to las preguntas tubíran que tener repuosta, fazeriemos l mais deilhas?