domingo, 15 de março de 2009

zbibir



Passou l eimbierno a aplediar pul berano, a rezungar cul friu, que le sfriaba las eideias i le tolhie las juntas de l cuorpo i nien l bafo deixaba salir a sue buntade; un die, apuntou a sul ls passos, lhebada por un sol ancho de lhuç, era primabera; todo se botou a salir de ls buracos, de ls tuoros, de las roupas, de ls casulhos, de ls nius: solo eilha se ampeçou a queixar de la calor, a aplediar por frescor, a dezir que ls páixaros nun sabien senó cantar, que las froles nun sabien senó frolir, i que l sol era un açago de lhuç i de calor; cunta-se que tenie ua natural anclinaçon para zbibir, suidades de quando era nada, daquel bien star que solo puode benir de la muorte an que yá nada mais demuda, nien l tiempo.



5 comentários:

faustino.antao disse...

I you pul frescor de la madrugada gustei de ler

Un abraço

Amadeu disse...

Buonos dies, amigo Faustino. Bienbenido, cumo siempre, a esta casica por adonde mos bamos bendo.

Un abraço,

Anónimo disse...

Amadeu,
era, diga-se anti-poesia i anti suonhos, ls que mos fazen ber todas las pequeinhas belhezas.
Ié lindo, amigo
Um beisico

Anónimo disse...

Hei!
saliu anónimo.., mas yé miu. siempre la mesma...
Adelaide

Amadeu disse...

Adelaide,

Muita beç, la anti-poesie i ls anti-suonhos inda son poesie i inda son suonhos: ua ansastifaçon que nien nós antendemos.
beisico,
A.