quinta-feira, 13 de outubro de 2011

nada mais que géstios


quando me biste, fuste als poucos
achando l camino de buolta,
l relampo de ls uolhos cumo guia,
l bafo a derretir l carambelo
de tue solidon feita castielho;

fúrun-te passando lhembráncias
fries nua frincha de tristeza,
cinema a correr na fita de l silenço
na pantalha de la nuite: bundou
la perséncia i sue selombra,

sien que perciso chamar-te fura:
yá gasteste las palabras, rombas
de sentido, coçadas de abandono,
puis nada mais que géstios
te lhebántan, solo eilhes carrégan

nas patas l sentido cun sou miel;
nun me digas nada, deixa-te ir
ombro cun ombro, anquanto me incho
de gana para nuobas buscas
i me chube mais lhume para acender ls uolhos:

tue cumpanhie pesa tanto
que ua sola palabra, a las bezes,
bundarie pa me smagar.




2 comentários:

Marcolino e Mara Cepeda disse...

Guapo Amadeu,

cumo un die sin mácula
cumo un die lhimpo de pecados

M

Amadeu disse...

un die lhimpo de pecados?
esso ye mesmo ua cousa mui cumplicada.
Bien háias pula besita. Yá custa passar sien eilha.

beisico
Amadeu