quadras a bulto / quadras soltas

quando ibas a moler
na ribeira faltaba auga
que solo andában las piedras 
puxadas pula tue mauga


tiempo houbo que an palabras
lhuitabas por nuobos dreitos
i acendies reboluçones
quedas te agora puls feitos

pulas tierras de Miranda
muito burro yerba come
mas por ende hai muita giente
que ateima an roubar le l nome

ten la lhéngua mirandesa
pul mundo muitos amigos
a ber se un die arrepassa
ls sous bielhos einemigos

nun s'aguanta, dízen uns,
outros, ai aguanta, aguanta!
quien la canga als outros pon,
un die destes lhieba tanta ...

quedas l die todo al lhume
beis l mundo i pouco fazes
nada puodes mas bien dás
ne l rachon culas tanazes

Fonso Roixo