segunda-feira, 16 de fevereiro de 2009

l die an que ampeçaba la segada


nun era capaç de salir de casa sien lhenço na cabeça, negro çque se le morrira l home; crecira-le l silenço ne l uoco de las jinelas de la risa, que nunca abrie; nin ousaba guada-chuba nin apressiaba l passo al atrabessar dies d'auga; zaiunaba-se siempre pul camino, colgada de l pan antre casa i campo; l xal d'ir a missa chubie pula cabeça anriba l lhenço, ranhido yá pul tiempo cumo prado al ampeço de primabera; traie siempre maduros ls uolhos, dun sereno que nun chegaba a ser triste, a relhuzir na nuite; morriu-se l die an que ampeçaba la segada, que nin ende quijo ser defrente de l pan, ouferecida a la fouce de l tiempo.



2 comentários:

Anónimo disse...

Amadeu,
Esta cuonta stá mi poética. Bós si sabeis!
Parabienes.
Adelaide

Amadeu disse...

Adelaide,

Staba a pensar an mi bó. Se saliu poema, nun fui d'aperpósito. Sabes, nun tengo un solo retrato deilha, que naquel tiempo nun teniemos máquinas. Anton, a la falta de melhor, fago-le de beç an quando retratos de palabras.

Bien haias por andares por estes caminos,
Amadeu