sábado, 2 de janeiro de 2010

bózian tan alto ls dies



cul passar de ls anhos, deste-te de cuonta de que tamien se fúrun morrendo ls diuses, i que todo camina pa la soledade sin fin, puis ye esse l çtino de quien se squece; bózian tan alto ls dies, que naide oube las falas que chúben pul tiempo lhargo i s'ancóstan al pedamiego de las cousas hounestas que quaije naide dá por eilhas; assi i todo hai que cuntinar, sereno cumo l aire que nunca para de passar i naide diç de sue eisséncia pa la bida, alhenos al demudar de ls anhos, l própio Eiolo yá squecido an sou lhapo; l tiempo bai fazendo amportante l que amportança nun ten, cumo se la scuma de la crista fura la óndia i l abanar de ls galhos al aire fura mais que ls própios galhos, i a cada cachico hai que ancarreirar uolhos i sentidos, nun se pérdan an caleijas sien salida; quando te sentires perdido, relhembra ls caminos an que puodas sentir tues pisagadas i nada mais se oube para alhá d'algun páixaro nas silbeiras de la borda i las formigas cuntínan an sou carreiron de silenço i çubiaço; a cada die tenes que t'afazer a tornar a la eisséncia de las cousas i a las cousas eissenciales, para alhá de todo l que te bai anchindo ls dies, ls stantes i ls blogues, agarrando l saber pula raíç adonde naide bota ls uolhos, naquel sereno de todo l que solo bibe de l que bal la pena i mos trai até nós mesmos a cada beç - i son tantas las bezes - que mos perdemos.





2 comentários:

ACangueiro disse...

Nel çfiladeiro de l Puio ruge barriento l Douro i ancóstan-se ls diuses bóziando que un nun stá solico i mimórian-se pessonas i silbados son galgados cun un pensamiento de que óndias de scuma soltarun bapores i mais lhebe será l aire de l'anho 2010.

Amadeu disse...

Ei, Antonho, si ye berdade, que bien guapo ye l Douro i todo esso.
Mas mira pa las telbisones, ls jornales, l que dízen las pessonas... i berás cumo ye un modo de boziar que somos lhebados a squecer l que ye mais amportante ne l nuosso die a die.
Quando un anho ampeça ye amportante nun squecer esso.
abraço,