poetas

Dízen que Nero le mandou pegar fuogo a Roma para fazer un grande poema. Hai poemas, cumo la Eilíada, de Houmero, que nádan an sangre i adonde a cada cachico se sinte l rugido de la guerra i s’assóman las gárrias de la muorte. Há muitos poemas, subretodo ls que le cháman épicos, cumo Jarusalen Lhibartada, de Torcato Tasso, que justefícan la guerra para chegar a ciertos fins. La berdade ye que nun se questuma pensar an nada desso quando se pensa an poesie. Mas fala-se agora dun creminal de la Sérbia, un tal Karadzic, que tenerá dado ordes que lhebórun a la muorte de miles de pessonas, i dízen ls jornales que el ye poeta i hai muita giente que se spanta cun esso. Mas ende el acumpara-se a Nero, pus nun fala de las mortandades de outros mas pratica-las el mesmo, i nun me parece que alguien le tenga chamado poeta a Nero, a nun ser ls mesmos boubos nacionalistas que fázen deste Karadzic un heiroi. Antoce, quando se fala de poesie, nun podemos star solo a falar dua cierta forma de screbir, ten de se falar tamien i solo de l que ye nobre na raça houmana: alguien sabe adonde esso ampeça i adonde acaba? Tal i qual cumo la poesie: naide sabe adonde yá l ye i quando deixa de ser, tal i qual cumo un mundo sien paredes a debedir, an que uas cousas éntran pulas outras al para drento sien que séiamos capazes de todo çtinguir de modo bien çclarado. Bendo bien, hai que preguntar: cun que creminales se puode abezinar l poeta andrento de l mesmo cuorpo? La poesie sirbe para ounir i nó para spartiçar la bida: adonde stá la brutidade ou la andefréncia pul mundo, ende nun puode star la poesie, por bien recursos poéticos que la scrita apersente. La poesie ye un ato criador, cria un mundo, cumo dízen que Dius fizo, bai a las ouriges de las cousas i de la spriença houmana, todo resgatando al sou pesado silenço, ponendo-se a la jinela de palabras an ser, a spera de quien la leia i cun eilha chuba até essas ouriges adonde todo puode renacer cumo cada manhana, siempre armana i siempre defrente. Nun ye poeta quien quier ou quien ye porclamado cumo tal: nun bonda la gana. Tamien nun bonda la forma nin bonda l cuntenido, ye perciso algo mais que nun sei l que ye, cumo ne l pan: nun ye solo farina i auga, mas percisa de furmiento que, al maçcar, nin se dá por el.