Poetas

Nunca antendi la rezon,
Porque habie de haber poetas
que se cúidan mais que ls outros:
esses solo ambérsan tretas.

Screbir uns bersos galanos
ou fazer rir ua huorta,
donde haberá mais poesie?
Ls bersos mais dua puorta

ténen pa benir al mundo:
palabras, si, ye berdade,
mas quando las cousas grítan
deilhas nun hai necidade.

Ls diuses que cun el fálan,
an poema ls ambentou:
sembra cielos, que sue alma
als einfiernos abaixou

pus sufre mundos i bidas
que mais naide sufre i pena,
assi cumo quien ten fame
i siempre queda sien cena.

Ten algo de boubo, als uolhos
de la giente que ten siso
i que al poeta dá pena,
mas sue bida ye un abiso

de l mal que fázen ls poemas
a quien ls lhieba muito a sério
i squece que l sou balor
le ben de séren mistério...

Poetas que sien ser boubos
dan bersos sien ser boubices,
mais bal que stéian calhados
ou fágan outras perrices.

Fonso Roixo