sábado, 19 de maio de 2007

De cabeça atada

Yerba de lhagarto ou bacielhos de las paredes (C. Ferreira)

Yerba de lhargarto, ou talbeç nó, inda berde (M. Bandarra)




(Diário tardiego dun fumador an suspenso 6)


Las purmeiras fumaradas que botei fui cun yerba de lhagarto. Nun era de berdade, mas fui l miu purmeiro tabaco. Por esse eimbierno alantre, agarrábamos la yerba bien seca nas frinchas de ls paredones. I aqueilhes granicos até que éran bien aparecidos al tabaco, mesmo naqueilha quelor castanha scura, quaije negra. Esse nome, yerba de lhagarto, fui siempre ousado por mi i miu armano Abel, yá que la habie nas frinchas de ls paredones de adonde, al menos ua beç, talbeç téngamos bido salir algue lhagartica ó algun lhagarto. Cumo nunca le coinci outro nome, el fui quedando até hoije. You era bien pequeinho, que inda nien andaba a scuola, i staba siempre cheno de miedo que me ardira aqueilho todo na cara i me chamuscara l pelo. Era miu armano Abel que trataba siempre de arranjar un cacho de jornal bielho, cousa que eilhi i naquel tiempo era quaije tan custoso de achar cumo ua mina. An primeiro, fazie-se la colheita de ls granicos secos de la yerba de lhagarto i arrebulhában-se bien nas manos para quedáren mais sfarelados. Apuis, cortabá-se l jornal als quadradicos i fazie-se un canhutico redondo que se colaba cun cuçpinha, metendo-se alhá un cinoés de yerba de lhagarto. Acender l cigarro esse era l porblema mais cumplicado, que chiçcar cerilhas cumo debe de ser era algo que solo se adominaba al fin dun cierto tiempo, i a poder de gastar muita caixa para acender fogueiras de lheinha quaijeque siempre húmada. Nun sei se l defeito era de la culidade de la cuçpinha, se de l papel bielho de jornal, se de la nuossa falta de albelidade, la berdade ye que ls nuossos cigarros quedában siempre mui mal amanhados, assi gordos cumo ls de tiu Golpe mas sien la sue arte. Queda para outro die la cuonta de ls cigarros de tiu Golpe. A las dues chupadas que daba quedaba lhougo cula lhéngua i la gorja a arder, de modo que ls cigarros de yerba de lhagarto nun dórun para pegar bício i fúrun spriéncia de mui ralas bezes. Assi i todo nun se me squecírun pus fui ende que l fumo me ampeçou a salir de andrento. Agora parou, stá an suspenso, i spero squecer-me del cumo fiç cul de la yerba de lhagarto. Bendo bien, se fumei ls mius purmeiros cigarros de yerba de lhagarto cun seis ou siete anhos i solo ampecei a fumar de ls outros, ls berdadeiros, ende puls 23 ou 24 anhos, esso quier que yá fui capaç de aguantar quaije binte anhos sien fumar. Portanto, la façanha até que nien ye assi tan granuda. I l que nun ye amportante, nun hai que le dar amportança.
P.S. - Solo hai mui pouco tiempo soube que le cháman a esta yerba bacielhos de las paredes. Tarde de mais, que agora yá nun adelantre.

2 comentários:

faustinoantao disse...

Daprender, daprender siempre, este dito queda bien eiqui.
Nesta buossa crónica quedei a saber mais ua beç cumo l angeinho i arte dórun ua fuorma de fumar.
Ancuontrei muita gráçia, quando dezis que la buossa purmeira spréncia fui cun yerba de lhagarto (nome que bós i l buosso armano destes a essa yerba), puis ye nuoba para mi.
Se por ende fura cun barbas de milho, inda baia que nun baia, cun essas barbas siempre i muitos dezien que l fazien. Cumo sabie i la fúria que daba nun l sei, porque nunca m’astrebi a spormentar.
Habie de ser buono, porque pula mie bida afuora muitos fúrun ls que desso dórun teçtemunho. Assi i todo porqui milho de barbas ( nun sei l outro nome) nunca faltou. Nun sei porquei, mas talbeç fusse melhor para forraige que l painço, mui pai siempre apostou mais ne l de maçaruocas, i assi fazie ua lhata ou dues del.
Agora quedo-me a pensar se cun essa yerba de lhagarto, que se quedaba ancerrada nas paredes nun stá por ende ua nuoba i pormissora çcubierta pa la ciéncia?
Nun se m’asparece que la sue porduçon fusse eilebada.
Faustino Antão

Amadeu disse...

Sabes, Faustino, nós nun teniemos desse milho, mas solo de l milho de ls bardeiros, que ua spécie de painço.
Mas esse milho de las barbas i de las maçaruocas - que nós le chamábamos l milho de las bacas - querie auga i... adonde la habie?
Nun habendo milho, la eimaginaçon nun deixaba de achar soluçones...
Mas un die deste inda hemos eiqui falar de milho, mas por outras rezones que nada ténen que ber cul fumar.