quarta-feira, 5 de setembro de 2007

Ben ende la guerra!


Nien l bafo de l resfuolgo se bei yá,
Fugida sien paraige i fuorças poucas
Todo pa trás deixando ban; las bacas
Nunca an cerrado assi pacido habien;
L pan na fin, toucino i pouco mais
Son ls que sobrórun çpoijos de las fames
Apedurar; l’aldé aburmelhou-se
An fornalha que nien ls chizmes scápan.


Nun prebiu Cristo fins de mundo assi
Tan rente a cada die: bai pulas rues
I sparba-se puls campos, ten la muorte
Essa tan mala manha d’abisar
Yá mui fuora de tiempo, i anda un home
Pul termo de gadanha, la de l feno,
Naide respeita l tiempo de secar
I de bolber que l feno siempre quier.


Se bás pa las arribas, nun te scapas,
Se cuorres la prainada, stás perdido:
Ben de loinge la fame de ls suldados
I dá sangre l comer i até trabalho,
Que a la purmeira nun s’áchan las cousas
I até se perde l tino puls caminos:
Son de poder las guerras i de fame
De quien lhuita, i oulor a mundo pocho.


Fracisco Niebro [sacado de Sfergantes dua Zeipopeia]

Sem comentários: