l friu i la muorte

- hoije tenemos la muorte an casa -

deziste me, i a falar mal de l friu

passeste todo l tiempo;

- nun stranhes, la muorte bai se achegando

siempre, sien sítio para adonde scapar,

mas este friu trai me siempre gana de berano.

dá me ua risa

dá me ua risa, que faga

las lhágrimas que nun me sálen

acháren sou camino:

nun queda tan triste la tristeza

se la lhabas na lhuç

duns uolhos que se t'oufrécen

para ber doutra maneira;

dá me ua risa fuorte,

capaç de me çfechar las puortas

que este financeiro eimbierno

sien fin me bai cerrando,

tan pouco bonda para derretir

l calantriç ancuscarado:

dá me ua risa par'hoije i pa manhana.

dá me ua risa i te darei an drobo

apuis sou camino ache:

nun chores quanto dás

puis outro modo nun tenes

d'anchires tous bazius sien fondo:

dá me ua risa, que ourgente

perciso dua casa pa la mie!

l mielro

oupie se la manhana

i chegaba me pulas frinchas de la jinela

un cantar de mielro:

era la moda de la lhuç

atamando l bruar de l die:

que amporta se nun bieno l mielro?

hai ua música an ser,

tan lhibre que yá nun queda agarrada a nada:

ende me nace clara la madrugada.

Ls doze (06)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

06.

Outra beç s'achega l guiador de carruiaije,

bola, bózia, scarbalha...

Alto, alto! Andriukha, á que de l rei!

Petrukha, bai atrás del!

Ta-tarara! Ta-ta-ta-ta!

L puolo de niebe bola pa l cielo!...

L guidor de carruaije scapa se cun Vanka...

Ua beç mais carrega l gatilho...

Tra-tarara! Bamos le a dar ua licion,

.......................................................

l que ye andar cula rapaza de outro!

L canalha scapou se! Berás

cumo manhana acabo cuntigo!

I Kátia, adonde stá? Muorta la deixei,

cun ua bala na cabeça!

Stás cuntenta, Kátia! Nun se mexe...

Stá muorta anriba la niebe!...

Firme la passada rebolucionaira!

Nun çcansa l einemigo!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (05)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

05.

Ten ua seinha ne l cachaço,

Kátia, la seinha dua facada.

Ne l peito, Kátia,

tenes ua ounhada fresca!

É,é, beila!

Que piernas tan guapas!

Lhebabas roupa de rendas;

por que nó agora?

Fodies cun oufeciales,

por que nó agora?

Fode, fode!

L coraçon salta me ne l peito!

Lhembras te, á Kátia, aquel oufecial,

que nun se salbou de la nabalha...

Nun se te lhembra del?

OU nun tenes la lhembráncia fresca?

É, é, refresca la,

mete me na cama cuntigo!

Polainas quelor de cinza lhebabas,

i buies choclate,

ibas pa la cama cun cadetes...

Agora bás cun suldados?

É, é, peca, peca,

Bás a sentir l'alma mais lhebe!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (04)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

04.

La niebe rebufa, l guiador de carruaije bózia

cun Vanka i Kátia ne l trenó!

I na carruaije lhieban

lhinternas eilétricas...

Á, á, arre!...

Cul capote de suldado rasgado

ten cara de burro.

Anrosca l bigote negro,

truoce lo

i adbirte se...

Eiqui stá Vanka, de cuostas lhargas!

Eiqui stá Vanka, l lhinguarudo.

Abraça la tue Kátia, cumbince la...

Eilha bota la cabeça para trás,

ls dientes deilha pequeinhos relhúzen cumo perlas...

Á, tu, Kátia, Kátia mie,

bochechuda!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (03)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

03.

Assi ye la nuossa mocidade:

serbir na guarda burmeilha,

serbir na guarda burmeilha,

i perder sues cabeças boubas!

Á, tu, probe,

doce bida!

Dólman rasgado

i fuzil oustríaco!

Para que todos ls burgueses súfran,

botaremos le fuogo al mundo,

fuogo al mundo que naciu cun sangre.

Senhor, la tue bencion!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (02)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

02.

Bola la niebe i passeia l aire,

I ls doze homes síguen.

Correias negras ne ls fuziles,

i alredror muitas lhuzes...

Antre ls beiços un cigarro,

l chapeu spetado

i nas cuostas un ás de ouros!

Lhibardade, lhibardade!

Á, á, ban sien la cruç!

Trá-tá-tá!

Faç friu, camarada, faç friu!

«Vanka stá cun Kátia na taberna...»

«Eilha lhieba l denheiro ne l miote!»

«Vanka ye agora rico...»

Era de ls nuossos i agora ye suldado!»

«Bamos, Vanka, grande çacana burgués,

dá le un beisico a la mie amada!»

Lhibardade, lhibardade,

á, á, ban sien la cruç!

Kátia stá acupada cun Vanka,

i stá acupada cun quei?...

Ta-ta-ta!

Hai miles de lhuzes alredror...

Nas cuostas la correia de l fuzil...

Firme l passo rebelucionairo!

L einemigo nunca se drume!

Agarra sien miedo ne l fuzil, camarada!

Bamos a çparar ua bala a la Santa Rússia!

La reacionaira,

la de las chabolas,

la de l culo grande!

Á, á, ban sien la cruç!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (01)

[Eiqui s'ampeça la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

01.

Nuite negra.

Branca niebe.

Aire, aire!

Nien un solo home s'aguanta de pies.

Aire, aire

por este mundo de Dius!

L aire faç boltiar

la branca niebe.

Hai cúscaro ambaixo la niebe lhebe.

Slúbios, pesados,

arrebálan ls passos

na rue... Á, cuitado!

Antre dues casas

stendírun ua cuorda.

I na cuorda un cartaç:

«Todo l poder a l'Assemblé Custituinte!»

Ua bielha chora,

nun antende l que quier dezir

aquel cartaç.

I porquei un cartaç tan grande?

Quantos miotes se podien fazer pa la garotada

que ten ls pies ancarambinados...

La bielha, cumo ua pita

scamujida, atrabessa un monte de niebe.

«Á, birge Santíssema,

estes bolchebistas bótan mos pa la foia!»

Aire que corta!

Nun aguantas l friu!

I un burgués nua squina

sconde bien l nariç.

Mas quien ye este? De pelo lhargo

i diç an boç baixa:

«Traidores!

Y la fin de la Rússia!»

Ye talbeç un scritor

ou un ourador...

I ende bai un home de saias,

sconde se atrás de l monte de niebe...

Porque stás hoije triste,

camarada cura?

Lhembras cumo datrás

andabas de peito salido

i la cruç te fazie relhuzir

la barriga als uolhos de l pobo?

Ua dama bestida de astracan

buolbe se para outra:

«I cumo tenemos chorado...»

Nesto arrebala

i - pumba! - cai se sparbada!

Ai, ai!

Bamos a ajudá la!

L aire stá cuntento,

cuntento i cruel.

Faç sbolaixar las roupas

de ls caminantes,

rasga, aperta i faç bulhir

l grande cartaç:

«Todo l poder a l'Assemblé Custituinte!»...

I trai mos estas palabras:

«...Fazimos ua runion...

...naqueilha casa...

...çcutimos...

i resolbimos:

Ir pa l quarto dieç rublos,

drumida binte i cinco...

... nun puode ser por menos...

Anda dende...»

Stá a quedar cun de nuite.

Queda la rue sien naide.

Solo quedou un pedinte

drobado

i l aire silba...

Ei, probe home!

Anda,

abraça-me...

Quiero pan!

I apuis l quei?

Fuora!

L cielo stá scuro.

Rábia, ua triste rábia

ferbe ne ls peitos...

Rábia negra, rábia santa...

Camarada! Queda

de uolhos bien abiertos!

Aleksandr Blok, zde la traduçon pertuesa feita zde l russo por Manuel de Seabra [Poetas Russos, Relógio d'Água, 1995]

que se m'amporta...

Las suidades de la pátria, que eilusion

hai lhargos anhos yá deixada!

Que se m'amporta a mi an que rincon

steia solica

ou por que streitas piedras de calçada

bou cun l saco de compras als quadriles

a camino dua stranha casa

que ye cumo ua caserna ou spital.

Que se m'ampórtan ls rostros ne l meio de ls quales

you puda bibir cumo un lhion rugindo,

i de que pobo me puodan spulsar,

que se m'amporta, pula cierta,

para andrento de mi?

Cumo un urso de la Kamtchatka sien carambelo,

para mi ye siempre armano

l lhugar de bida i houmildaçon.

Nun me gusta yá la chamada de l lheite

de la mie guapa lhéngua materna.

Que se m'amporta la lhéngua

an que nun sou antendida?

L guloso lheitor de jornales

I ourdenhador de diçquediçque

ye de l seclo binte

i you de todos ls seclos!

Marina Tsvetáieva, cun assento an traduçon para pertués zde l russo, feita por Manuel de Seabra [Poetas Russos, Relógio d'Água, 1995].

Para que me sírben ...

Para que me sírben eisércitos de modas

i l gusto de la poética sentimental?

Para mi na poesie nada ten amportança

a nun ser ls homes.

Quando soubires de que lexeira

sálen ls bersos, sien bergonha,

cumo ua frol amarielha na tapada,

cumo un cato ou cumo un roque.

Un bózio de rábia, alcatron cun oulor a fresco,

mofo scundido na parede...

I la poesie yá sona ferbiente, amerosa,

para miu i buosso cuntentamiento.

Anna Akhmátova, ousando la trduçon de l russo para pertue´s de Manuel Seabra [Poetas Russos, Relógio d'Água, 1995]

Hamlet

Serena l albrote. Ne l trabiado stou

acontra l portal de la puorta,

al loinge, recoincendo de modo zlido

l que l miu tiempo puode inda traier.

L scuro de la nuite cuorre a cacharron porriba de mi

miles i miles d'uolhos que me míran;

mas Abba, Pai, se essa fur la tue gana,

aparta este cálece de ls mius beiços.

Cun firmeza l tou querer ten l miu amor,

este papel que me deste quiero tener;

mas agora purpara se un drama defrente:

poupa me agora de l tou camino.

Assi i todo la orde de ls atos nun demuda,

la fin de l camino ye bien cierta.

Stou solo. Agora ye l tiempo de ls Fariseus.

La bida nun ye cumo un passeio al campo.

Nun dá jeito ser afamado

puis nun ye esso que me upe.

I nun bal la pena tener arquibos

nien perder tiempo cun manuscritos bielhos.

L camino de la criaçon ye l'antrega cumpleta

i nun fazer rugido ou tener sucesso.

Anfeliçmente, nada quier dezir

cumo ua alegorie andar de boca an boca.

Mas ye perciso bibir de modo hounesto,

bibir dua tal maneira que na fin de cuontas

benga até nós un amor eidial

i óubamos l chamar de ls anhos que han de benir.

L que ye perciso ber outra beç

ye l çtino, nó antigos papeles;

lhugares i capítalos dua bida anteira

anotar ou eimendar.

I margulhar ne l anonimato,

i scunder ne l ls nuossos passos,

cumo scápan las bistas na nubrina

al meio la scuridon.

Que outros nesse rastro bibo

seguiran l tou camino passo a passo,

mas tu própio nun debes de çtinguir

la derrota de la bitória.

I nun debes por un solo sfergante

arrecular ou atraiçonar l que tu sós,

mas star bibo, i solo bibo,

i solo bibo - até la fin.

Boris Pasternak [Moscovo, 1890-1960], zde ua traduçon de l russo para pertués por Manuel de Seabra [Poetas Russos, Relógio d'Água, 1995]

a la moda de antrada

Ne ls terribles anhos de 'jovismo' [de Ejov, xefe de la polícia secreta de Staline] passei zassiete meses nas filas de la cadena se Leninegrado. Ua beç, até ua pessona me 'recoinciu'. Por esta altura, ua tie de beiços azulados que staba atrás de mi, i que pula cierta nunca oubira sequiera dezir l miu nome, spertou de l suonhos an que todas stábamos i preguntou me al oubido (eilhi todo mundo falaba baixico):

- Podeis cuntar esto?

Respundi le:

- Puodo.

Ende, a modo ua risa slubiou se por aqueilho que an tiempos yá habie sido l rostro de la tie.

Abril de 1957, Leninegrado.

Anna Akhmátova [1889-1966], cun assento na traduçon de l russo para pertués, feita por Nina Guerra i Filipe Guerra [Só o sangue cheira a sangue, Assírio Alvim, 2000]

Guarda mie fala para siempre

Guarda mie fala para siempre, pul gusto a fumo i mauga,

Pula resina de l stoicismo, pul peç de l trabalho lhial.

Ne ls poços de Nóvgorod adocicada i negra ye l'auga

Para spelhar la streilha de siete barbatanas pul Natal.

Para esso, miu pai, miu amigo, miu bruto ousseliar,

You, armano squecido, de la familha de l pobo arrenegado,

Tan ancestrales poços scabarei que ls Tártaros, ne l baldo,

Puodan abaixar al fondo del ls príncepes para ls afogar.

Para que me ámen estas forcas ancarambinadas you dou le

Al gorodki - jogo an que me apúntan la mala muorte -

La camisa de fierro nun tiro mais, acharei ne l monte

L cabo pa la machada cumpridor de l'orde de Pedro.

(3/5/1931)

Óssip Mandelstam [1891-Moscovo 1938], ousando ua traduçon pertuesa de l russo feita por Nina Guerra i Filipe Guerra [Guarda a Minha Fala para Sempre, Assírio Alvim, 1996]

Bistas cun mundiada

Uas bistas cumo dében de ser, melhoradas pula mundiada.

Solo se bei la carapota de las arbles, campanairos i capielhos d'eigreijas.

l que se quier dezir assoma se a la boca afogado pula eimoçon

i de l nobielho de las palabras solo se salba 'era'.

De l mesmo modo, l speilho amostra de l beterano la tiesta i la calba,

mas nó l rostro, para nun falar de ls colhones. Ambaixo, l'auga

lhieba todo l que se screbiu ou dixo. Porriba,

un farrapo de nubre. I tu de pies al meio l'auga.

Talbeç l sítio de l'acion seia an algun sítio de ls Países Baixos,

antes de tenéren las presas ilas rendas, nome cumo De Moll

ou Van Dyke. Ou antoce l'Ásia, ne ls trópicos, adonde stan afeitos

a l'auga que adóndia l suolo, mas tu nun sós arroç.

Bei se que stá a chubir yá muitá, pinga a pinga, un die apuis outro, anho apuis anho,

i que toda esta auga doce apledia por nuobas jeiras d'arada saladas.

I bieno l tiempo de poner l nino als ombros, cumo un periscópio,

para ber al loinje l feturo de ls nabius de l einemigo que ende bénen.

Iosif Brodskii [Leninegrado 1940 - 1996 Nuoba York]

cun assento an traduçon, de l russo para pertués, de José Leite, an Paisagem com inundação, Cotovia, 2001.

Miu abó nun lie bersos

Tubo anton que deixar la hourtica

que tanto le gustaba i l lhumico de l lhar

i bieno ua purmeira beç abaixando la cuorda

de l lhitoral i cumo era moço moço

quijo alhá saber de ls bersos

de la senhora Rosalía de Castro

parecie le l paiç jeitoso

las rapazas tenien modos

suables i dua sien remédio

se namorou lhougo

mas esso fui de la segunda beç

quando yá era l amprouado duonho

de la mula de l soto del

an Sangalhos achórun que era un metediço

fazírun le ua spera a tiro

scapou se cun alblidade al fin casou se

l nieto ye que muitos anhos apuis

choraba por el al ler na mocidade

téñovos pois que deixar

arboriños que prantei

fontiña campanas Virxe d'a Asunción

com un aperto no corazón

Fernando Assis Pachedo [que hoije, 1 de febreiro fazerie 75 anhos se fura bibo], in Variaçoes em Sousa (1987)

[Teve pois que deixar la hortinha

que tanto amava e a fogueirinha do lar

e veio uma primeira vez descendo a corda

do litoral e como era moço moço

quis lá saber dos versos

da senhora Rosalía de Castro

parecia-lhe o país jeitoso

as raparigas tinham modos

suaves e de uma sem remédio

enamorou-se logo

mas isso foi da segunda vez

quando já era o garboso dono

da mula do seu comércio

em Sangalhos acharam-no um intruso

fizeram-lhe uma espera a tiro

safou-se com habilidade enfim casou

o neto é que muitos anos depois

chorava por ele ao ler na adolescência

téñovos pois que deixar

arboriños que prantei

fontiña campanas Virxe d'a Asunción

com un aperto no corazón]

Las mies palabras

las mies palabras

znudei las

até eilhas me quedáren

resfolgando amplaches

ambaixo la lhéngua.

Buolbo las

cuçpo las

sorbo las

assopro las

stico las

de ls pies a la cabeça

stendo las

Fago las grandes

cumo ua nabe lhunar

i pequeinhas cumo un nino.

Busco an to la parte la lhinha

que me diga

adonde me puodo achar.

Ulla Hahn [Almanha, 1946 -]

[Serbi me de la traduçon de João Barrento, A Sede entre os limites, Relógio d'Água, 1992]

la muorte ye ua frol

a muorte ye ua frol que solo abre ua beç.
Mas quando abre, nada se abre cun eilha.
Abre siempre quando le dá la gana, i fuora de tiempo.
La muorte ye ua frol que solo abre ua beç.
Mas quando abre, nada se abre cun eilha.
Abre siempre quando le dá la gana, i fuora de tiempo.


I ben, grande paixarina, anfeitando tuoros a oundear.
Deixa me ser l tuoro fuorte de sou cuntentamiento.


Paul Celan


[traduçon zde l pertués, ne l testo traduzido de l alman de João Barrento an Sete Rosas mais Tarde, ed. Cotovia, 1997, p. 15]

buscador de la berdade

buscador de la berdade

sigue nanhun camino

todos ls caminos lhieban adonde

la berdade stá eiqui

e.e. cummings [1894-1962 (USA)]

[seeker of truth

follow no path

all paths lead where

truth is here]

La purmanhana

Tomara you ser sabedor de nada cumo la purmanhana

A pousar sou mirar

Naqueilha bielha reina al medir ua cidade

Cun un alfinete de broixe,

Ou ne ls homes secos que bírun

Zde sues amprouadas Babilónias

Ls çcuidados planetas an sues buoltas,

La muorte de las streilhas adonde la lhuna nace,

I agarrórun sues trabas i fazírun somas;

Tomara you ser sabedor de nada cumo la purmanhana

Que solo eilhi quedou, a abanar la relhuziente carruaije

Porriba ls scuros quartos de ls cabalhos;

Tomara you ser – yá que nanhun coimiento bal ua palha –

Garotico i sabedor de nada cumo la purmanhana.

W. B. Yeats

[The dawn

I would be ignorant as the dawn

That has looked down

On that old queen measuring a town

With the pin of a brooch,

Or on the withered men that saw

From their pedantic Babylon

The careless planets in their courses;

The stars fade out where the moon comes,

And took their tablets and did sums,

I would be ignorant as the dawn

That merely stood, rocking the glittering coach

Above the cloudy shoulders of the horses;

I would be – for no knowledge is worth a straw –

Ignorant and wanton as the dawn.]

Lisboua

Ne l bárrio de Alfama, cantában ls eilétricos amarielhos nas costielhas.

Habie eilhi dues cadenas. Ua pa ls lhadrones.

Saludában d'andrento las cadenas.

Pedien que le tiráran retratos!

"Mas eiqui" dixo l cundutor, rindo se cumo un ser debedido

"eiqui stan ls políticos". Bi façadas, façadas, façadas,

i mui alto, nua jinela, un home

que cun minoclos miraba l mar.

La roupa colgada de l azul. Calientes, las paredes.

Las moscas lien cartas mui pequerricas.

Seis anhos apuis preguntei le a ua tie de Lisboua:

"Esto passou se mesmo ou fui you que l sonhei?

Tomas Tranströmer

[poeta sueco que ganhou l prémio noble de lhiteratura an 2011.

Serbi me de la traduçon spanhola de Roberto Mascaró, que puode ser lida an El Cielo a medio Hacer, ed. Nordicalibros, 2011 (3.ª reampression)]

nuites

pulas lhargas nuites

ye l scuro un delor

i spertas aplediando

por cumpanha:

tenes, bien sabes, ua

eiternidade para star solo.

chubir i abaixar

para chubir, tanta scaleira!

para abaixar, bonda caier...

entro pula puorta deste anho

entro pula puorta deste anho inda cun gana de mundo, ls çapatos al modo para lo andar mais un cacho, la ferramienta al modo pa le fazer mais ua andada, abierto als delores, a las canseiras, a las zeilusiones, mas siempre sabedor que nun faltaran arbles cun fruita fresca, huortas percisadas de regar, puntos adonde las risas mos puoden debolber sou retombo, sien berdades ne l bolso puis nunca son punto de chegada i siempre busca, sien norte para adonde camine que you gusto tamien de l sul, de l este i de l oueste, que an to l lhado sagrada ye la tierra, sagradas las pessonas cun sues misérias andrento, sou einfierno de guerras, de fames, de delores, tenendo até que de ls brugos me zbiar, passo a passo andarei anquanto puoda, sien un çtino puis son tantos aqueilhes que por mi cháman que nun tengo piernas para a todos chegar, assi i todo traio los na cabeça i siempre le puodo atirar l regoixo dun pensar, quien sabe se nun tenerei que alhá un die chegar, por esso que nunca puodo cerrar puortas nien mundos...

bun 2012!

A todos ls que porqui ténen passado, uas bezes calhados outras bezes marcando la sue perséncia cun un comentairo, un bien háian pula cumpanhie.

Pa l nuobo anho deseio le muita salude para que puodan cuntinar a passar porqui se le dir la gana, mas se nun le dir la gana deseio le l mesmo.

La soledade de las palabras cuntinará l sou camino, siempre houmildes puis de anhos nada anténden i l tiempo ye algo cun que nunca quejírun nada: andeble será siempre la fuorça que le sal de andrento.

pregunta 77

se quieres ua respuosta, portquei preguntas?

dito (56)

anganhar nun ye sperteza, mas la cobardie ne l sou melhor.

dito (55)

stás ciego se na cinza nun sós capaç de ber l fuogo que la fizo.

dito (54)

inda que nun beias cumo esso puode ser, nunca deixes de acraditar que ls dies de manhana te puoden cuntinar a dar horas felizes: ampeça yá a purpará-los.

screbir

ben stando algo calhado este miu blogue: talbeç seia solo por ua cierta necidade de deixar çcansar las palabras: se screbir fura ua oubrigaçon, eilhas até habien de botar sangre de delor i para sangre yá bien bonda l muito que cuorre por ende.

un bun sítio para morar

fui le l tiempo nas manos zenhando
ls caminos de la prainada, perdidos,
adonde ls uolhos nunca achórun pouso,
este solo al modo para páixaros

i outros que fazírun de l bolo
un modo de çpreziar la tierra i
ls passos neilha: cunta me la tue stória
al modo para fazer mie casa,

que lhembráncias son un bun sítio
para morar, ceçon adonde s'agárren
raízes que aguánten l feturo cun sues
airaçadas a la nuitica de ls dies bielhos.

Cesária

siempre la música bola i calece
inda quando ls uolhos
yá nun béien quien canta.

mesmo sabendo

cansado de acercas abraçar,
abriste un die tous braços:
na prainada que crieste
a la jinelas assóman-se anfenitos:
agora, deixa-te ir
mesmo sabendo que nunca chegarás.

anquanto

Anquanto punto a punto cuoso

ua cousa a outra cousa

bolbendo un l que era dous ou mais

morriu-se tanta tanta pessona

i you tamien me morri

deixando las mies manos

i las partes que cosi.

Pedro Tamen, O livro do sapateiro [9], Publicações D. Quixote, 2010.

Traduçon de Fracisco Niebro

[an pertués:

Enquanto ponto a ponto coso

uma coisa a outra coisa

tornando um o que era dois ou mais

morreram tantas tantas pessoas

e eu também morri

deixando as minhas mãos

e as partes que cosi.]

piedra ne l camino

ralos dies nun dás cun piedras

a atalancáren te l camino:

nun salas, que te perdes;

nun buolbas atrás, porque te pisas:

dá la buolta i passa alantre, mas,

se podires, ye melhor que la pongas

na parede: nun merece tanto

çprézio cumo l que a eilha mesma se dá.

Adenteste la bida

Adenteste la bida

cun fame de lhobo moço.

Todo neilha te soubo bien

i nunca pa la rue le boteste ua forfalha

até que la deixeste

nun sfergante

cula fuorça cun que habies bibido.

Tu, l sereno

morriste-te

na biolença de ls fierros na strada.

Tu, l amante de las cousas guapas

matórun-te

na feiura anónima de l alcatron.

Bárbara Lopes, Poemas do Zimbro, 2009, ed. outor

[an pertués:

Trincaste a vida

com fome de jovem lobo.

Tude nela te soube bem

e nunca lhe rejeitaste uma migalha

até que a deixaste

de repente

com a força com a tinhas vivido.

Tu, o doce

morreste

na violência dos ferros na estrada.

Tu, o amante das coisas belas

mataram-te

na fealdade anónima do asfalto.]

calamitas - quelamidade

la palabra lhatina 'calamitas' ben de 'calamus' que quier dezir 'cuolmo', antre outras cousas. L cuolmo ye la canha de ls panes i por esso ye mui andeble, puis cun qualquiera assopro ou termienta se cobra, subretodo se yá stubir seca i granada. Assi i todo, l cuolmo de ls panes puode mui bien defender-se de las airaçadas i termientas porque las canhicas stan mui juntas i stan todas a la mesma altura i puoden debelgar i marfolhar sien porblema. Mas las spigas que crecíren arriba las outras, essas quédan spuostas a las airaçadas, son facelmente agarradas pula mais pequeinha termienta i puoden-se scochar puis nun ténen las outras pa las amparar al modo que debélgan. I ende dá se un modo special de «calamitas», quier dezir, de scachar ls cuolmos, de scachar subretodo la cabecica, la spiga que chubiu porriba las outras.

cuido que somos specialistas nesse modo de nun deixar que nanhue spiga arrepasse porriba de la senara, que nanhue pessona subirta porriba la medianie de l rebanho adonde todos andamos; ende todas las fuorças se atíran acontra quien subertiu i nun çcánsan anquanto le nun scocháren la spiga, quier dezir, la cabeça, ou obrigá-la a abaixar a l'altura de todos ls outros nien que tenga de se poner de zinolhos; queda anton, l abiso: faç todo por creceres, mas apuis nun te admires que te quérgan cortar la cabeça ou oubrigar a azinolhar.

nun quieren las palabras

quando outros las agárran
i maltrátan, nun quieren
las palabras ser ousadas:
quedar calhado puode tamien
ser modo de las respeitar.

suidades de ti

atrabessas la nuite de ls géstios
para adonde móran las cousas
hounestas i l sereno cuorre cumo
aire an agosto a la tarchica:

chubes te na nubrina, abres le
l manadeiro als suonhos i rucecitas
ls tous muortos, esses que an ti
nunca morrer deixeste

i cun eilhes bibes outro que yá fuste,
que talbeç inda seias, mas
de te achar yá nun sós capaç:
nunca assi te muorres de suidades.

claridade

stiraçaba-se l sol pula prainada
i al claro die nun achei modo
de dar cula claridade que inda busco.

nunca

nunca mos bundaran las lhágrimas pa
la bergonha que mos anxalmórun
de falar an lhéngua nuossa
i la rábia spetada cumo spino
saca la stória al assossego de sou suonho.

fazie me fiestas l aire

solo era mie la rue,
fazie me fiestas l aire,
casando sue solidon na mie:

calhei me ls passos, nun fúran
a spertá le l miedo i l choro.

rugido

alisei la manhana culas
manos, que yá nun aguantaba
l rugido de las horas a rober.

todo me queda znudo

a las bezes chube
la nuite pul die arriba
i risas, mirares, mesmo ls passos,
todo me queda znudo cumo
deitado an cama adonde nunca
drumo ou mius pensares çcanso.

Salimiento de Ls Quatro Eibangeilhos an Bergáncia

Die 27 a las 15:00 bamos a fazer lo salimiento de Ls Quatro Eibangeilhos an Bergáncia, nel Centro de Arte Contemrânea Graça Morais. A apersentar stará l miu amigo António Tiza.

Quien podir aparecer será un gusto grande.

mimória de D. Fonso Mendes de Bornes

an 25 de febreiro de 1257,
D. Fonso Mendes de Bornes dou
un tércio de ls sous bienes para
ser anterrado ne l Mosteiro de Moreiruola;

ne l berano de 2011, fui me
a saber de l jazido de
D. Fonso Mendes de Bornes
ne l Mosteiro de Moreiruola:

nien ua piedra quedou, solo
un sbarrulho de manos al cielo
reza, nien raça de
D. Fonso Mendes de Bornes;

puso sue sprança na piedra dura,
sue fé na grandura dun mosteiro, mas
D. Fonso Mendes de Bornes yá solo
eisiste nun andeble i zlido pergamino;

andube pul cascalho de l sbarrulho
i sues beciosas silbeiras, pisei
la tierra i mirában me las seinhas de
ls pedreiros: era quanto quedaba de

D. Fonso Mendes de Bornes.

nun quergas

nun quergas acupar todo l camino
deixa campo pa l arrepassar i até
quien noutro sentido benga:
porque has de julgar quien passa
i arrepassa se nien tu sabes
adonde tous passos te lhieban?

diário 78

saber quei fazer de quemer a cada die era l que mais me custaba: agora hai de todo, mas nessa altura nun teniemos nada nien adonde ir a saber del, ende ye que era albelidade fazer quemidos, berdadeiros xefes de cozina éran muitas de las mulhieres desse tiempo, mas naide le daba balor.

solo cun tous passos i l camino

pousa te nua piedra de l camino
al modo para sentalho, mas solo
anquanto l resfuolgo se faç
sereno, que lhargo por ti spera
l camino: nada pára inda que quergas,
mais bal antoce que camines

ne ls scampados spuosto al aire
ne ls balhes atrecidos de selombras
siempre hai rosas tardiegas que
al perdé-las solo quédan ls picos:
deixa que cuorra l sangre
puis muito tarda an acbar-se i

nien siempre un andar sereno
te puode adundiar l'alma: assi
al menos nun ten oulor a mofo
nien ls piquetes até al cielo
ancandilar te puoden: terreno
sós solo cun tous passos i l camino.

pregunta (76)

solo haber bisto l mar pula purmeira beç als zanuobe anhos tenerá algue anfluença ne l mirar?

palabras

nunca son de mais las palabras
tan cúrtio le sacamos l sentido:

porque sóbran antoce i mos
queda un sabor a scaleto de
sílabas znudas i ls anjos de
la gramática tan pouco mos dan

sítios a que la falta de lhuç
dá sumício al retombo por que
siempre speramos

l oulor a burmielho

l oulor a burmielho antranhou se cumo
un beiso an busca la madureç,
amarelhando lhembráncias doces
alas que nunca déixan de ser passos

pulas raleiras de suonhos sónan
campanas perdidas, cansadas
de arrolhar bózios de soledade
que las palabras de outonho

nun dan para atamar: nun me
preguntes l segredo de ls fruitos
que solo a sumbrar daprendi
cerrado nun pertérito ampurfeito

nun pare sous passos l resfuolgo
i l pie de mar cun que acúbren
l cielo ls uolhos siempre mos lhebará
atrás l bolo sien tiempo de pousar

Cumbite - Salimiento de Ls Quatro Eibangeilhos an MIranda

nunca me gustou l aire andrento

l aire de outonho ye
un almanecha: nun dá para fazer poesie
cumo quando marfuolha ne l panes
i pon alas ne l pelo de las rapazas;

mas que serie sien el l baile de
las fuolhas? cumo saberiemos que ye
cantador, que brua uas stranhas
modas an ciertas nuites?

bien sei que se mete pulas
frinchas de las casas que ténen
frinchas i ne l berano passa a

dies sien un assoprico dar:
nó, nunca me gustou
l aire andrento de l poema.

papoulas

you cun gana de papoulas
i l outonho deixou-me sien flor
i sou burmeilho de bida:

screbi-la i la palabra
creciu frol de sonido
na pantalha aburmelhada.

dito (53)

se fur lharga de mais la nuite, senta-te anriba deilha cumo piedra adonde çcansas de lharga caminada:ganharás fuorças pa la madrugada.

dito (52)

nun speres aprobaçon na bida cumo an eisame, mas nien por esso deixes de lhuitar pula purfeiçon an todo.

nun mires tanto al para trás

pul outonho, quédan
las arbles fartas de sues fuolhas,
mas mal las déixan caier lhougo
outra gana le nace:

nun mires tanto al para trás
que palantre queda la primabera
i nien l delorido ambierno
le tapará l camino.

l sentido de hoije

nun paras de abaixar
até adonde l resfuolgo ye custoso
sien que beias fuorças para
ampeçares ua chubida nuoba:

deixa-te quedar cumo quien çcansa
que todo ganhará sentido
l sentido de hoije
nunca de onte ou de manhana.

nubrina ne l Maron

hoije antrei por ua nubrina adrento
sali dalhá perdido, puis inda busco
un mundo outro adonde achar puoda...

pudira

pudira you lhebar te al cuolho
essa risa cun que me derretiste
l cúscaro de la mocidade un die
i de nós nun fazerie caçuada l tiempo

fazer, fazie, mas nien
mirábamos par'el

diário 77

naquel die benírun-me uns delores nuobos, que nun tenien sítio, mas benien de todos ls lhados cumo se stubira anferrujado: fui ende la purmeira beç que aplediei por quando tenie zuito anhos; cul tiempo fui-me afazendo, mas hai cousa a que nunca até agora fui capaç de m'afazer: hai cousas a que nun me quiero afazer, anque tenga de las aguantar até la fin de mius dies.

pregunta (75)

hai giente que passa ls dies a tratar este paiç cumo l pior de l mundo: yá que nun se ban ambora, nun serie buono que fazíran algo para el quedar melhor?

dito (51)

nada speres de quien nada spera.

dito (50)

ua casa assenta an bários pedamiegos: puodes pensar que l tou nun ye amportante, mas se l sacares la casa sbarrulha-se.

dito (49)

se un die te dir la gana de te 'ires abaixo', mira purmeiro alredror i cunta las pessonas que se stríban an ti para nun se 'íren abaixo': berás que nun te faltaran fuorça para te aguantares.

dito (48)

la fruita que quemiste outros ponírun l'arble: nun deixes de poner ua arble inda que nunca le bengas a quemer la fruita: se podires, nun ye buono que deixes díbedas por pagar.

pregunta (74)

porquei poniste l diospireiro se nun sperabas quemer le ls diospiros?

mapa

cuorre me cumo sangre
ua fileira sin fin de rostros
zenhados a angúrrias
curbas de nible dun mapa
adonde nunca me perdo:

ye ua gente que fiç mie
de que solo ls uolhos nunca
fúrun zupiados, firmes
cumo rei anriba l trono
claron adonde todo naciu negro.

rumiaco

amarreste te até
bater cula cabeça
ne ls suonhos, rastreiros
de perdidos: nun ténen

cura essas brechas,
nada cobra las lias
que te fázen rumiaco.

lhargo, l delor te lhieba

ye lharga la prainada
nun para l aire de chorar
delores donde mal cabes
ye agre l riu de l tiempo
las feridas por lhabar
nun para l aire l choro

sfria te un beiso de soledade
nas nuites yá nun te conheces
lhargas, lhargo l amargor
de l sangre nas benas de l squecer
ye lharga la prainada
lhargo l delor te lhieba

Salimiento de Ls Quatro Eibangeilhos

CUMBITE

La Sociedade Bíblica i la Associaçon de Lhéngua Mirandesa ténen l gusto de bos cumbidar pa l salimiento de la obra Ls Quatro Eibangeilhos, traduçon an mirandés de Amadeu Ferreira

l die 12 de nobembre (sábado) a las 16h30 na Lhibrarie Ferin, na Rue Nuoba de l Almada, n.º 70, Lisboua

cun apersentaçon de l Porsor Aires Nascimento, de la Academie de las Ciéncias de Lisboua

pacéncia

nun speres que buolba Perséfone
pa que relhuza guapo l mundo:
hai belheza para alhá la primabera,
hai bida inda quando s'arrecuolhe;

nun ye pacéncia spera pura:
ye sien fin busca, cumo Oulisses,
ye sien çcanso fazer, cumo Penélope,
i l ber puodes botar alhá de ls uolhos.