domingo, 30 de maio de 2010

preguntas (04)

un die apareciu-me ua pregunta que inda nun fui capaç de le respunder:
será que dius eisiste mesmo?
porque nunca se me habie puosto essa pregunta, cumo inda nun se le pon al mais de las pessonas de l mundo?

porque será que essa pregunta se me puso apuis de passar anhos i anhos a studar que era possible demustrar que dius eisistie, solo cun ajudas de la rezon, de l pensar?
será, cumo cuido, que fui la demustracion que falhou?

nun serie mais simpres dezíren que dius ye un porblema de eirracionalidade, quier dezir, de fé?
cumo tardei tanto tiempo a çcubrir que nun la tenie, nien a saber quei esso era, anque por muitos anhos tubira pensado l cuntrairo?

que me quedou desse studo de dius, para alhá dun cierto modo de ber l mundo i las pessonas?
tanta cousa que nien sei dezir: puode haber nacido ua ética desses sbarrulhos todos?

sábado, 29 de maio de 2010

preguntas (03)

porque nun hai nius de ciguonha nas eigreijas de Lisboua
nien de andorina ne ls beirales - ye berdade que son ralos ls beirales al modo -
nien se oube cumo tal un chasco?

quedórun pardales i palombras i inda mielros ne ls huortos de trás las casas
a repersentar la paixarada
á, i las gaibotas que a las bezes chúben pula cidade - cumo ua que pousa adonde trabalho i a la hora de delantre passar l papa nien para el mirou -

porque será que eiqui nun me dá star cun atento a páixaros?
será porque alhá ne l fondo i cumo todos, sinta que eilhes nun son amportantes?
será de yá nun percisarmos de prumas para screbir - nesse tiempo la scrita era ua mortandade de páixaros -?

a las bezes bénen-me a bejitar l cuorbo de Poe,
l perdigon de Camões, l reissenhõr de Bernaldin,
mas porque será que nunca cántan i solo oubo Poe, Camões i Bernaldin?

hai uns meses, bi ne l Pacífico de Chile, an Isla Negra,
ls grandes i mal amanhados pelicanhos anriba las piedras de la praia, dourados de sol: onte tornei-los a ber nua praia de l Golfo de l México, negros i a relhuzir a BP.




sexta-feira, 28 de maio de 2010

Preguntas (02)

oubes martelhar, de die i pula nuite, fázen l caixon de l tou paíç,
cumo nun te dás de cuonta que tamien sós carpinteiro?

bés passar l'antierro de l tou paíç,
cumo nun te dás de cuonta que tamien bás andrento l caixon?

alguien palhestra subre quien matou l tou paíç,
cumo nun te dás de cuonta que tamien tenes na mano la faca ansagrada?

yá na foia, liste l que alhá screbírun: matórun este paíç.
ende te deste de cuonta que este paíç era l tou i por esso screbiste: suicidemos-mos.

quando, un die, biste rucecitado l tou paíç, al ber cierta giente pregunteste:
cun que dreito benírun estes a la fiesta, se nunca ua mano le botórun?

quarta-feira, 26 de maio de 2010

Preguntas (01)



quando ampeça un a ser bielho, an que die, an que sfergante?
caiato, pelo rúcio, reforma, ou solo uns uolhos tristes que nun áchan punto de mira?
mejar-se, cagar-se, babar-se, yá nada se le andreitar para nada, ou solo un modo de ls beiços se zafazéren de palabras i de risas?
mandar fazer la foia, nun aguantar un sinal berde na passadeira, ou solo quedar uorfano de suonhos?
yá haber acabado la prestaçon de la casa, nada de nuobo querer daprender, ou solo un cierto modo de mirar al para trás?


nun me digas que bielhos son ls benairos, que tengo priessa de saber, agora que nien ls mius filhos me trátan por 'miu bielho'.
sales a la rue i cada buraco ye ua mina an campo de batalha, que nada queda anteiro de l tornozielho als quadriles,
arrastras ls delores cumo bielha carroça que nun aguanta ls sotánganos de l camino,
las angúrrias sucos ne l lhombo azul de las benas salidas,
cada artroç un cabeço adonde por miedo nun te assomas.


nun me digas que bielho ye un nome que se dá als muortos de que yá nun se sabe l nome.
antreste para un lar que ajudeste a fazer las paredes i adonde jureste nunca bibir,
yá biste cumo l tiempo droba la gana cumo la calor al mais gordo aço?
antretenes-te a cuntar las partes de l cuorpo que yá nun funciónan: será essa la geira de la belheç?
las biaiges son siempre a camino de l spital i l maldito toque de l'ambulança faç-te lhembrar un cierto de modo de ancordar.
bien apuras l'oubido i muito fálan de la guerra que dás de nuite i de die: será essa la seinha?


de berdade que perciso de saber l marco adonde ampeça:
yá que nun pude gozar la mocidade,
al menos quiero saber quando debo ampeçar a gozar la belheç que, tamien eilha, bai i nun torna mais:
arrenego de ambentar mintiras subre paraísos de l passado i giente buona que solo habie datrás,
perciso de me purparar para agarrar l que agora me stá a passar a la puorta, seia el einfierno ou paraíso



quarta-feira, 12 de maio de 2010

diário 51


agora dei an me perder, la cabeça nua borracheira sien bino: al que ua pessona chega!, yá nun ye tiempo de andar por acá, anque tubira ido a spera de l doutor a las seis de manhana: que ha de un fazer? sabes, un dá-se de cuonta de que se bai slubiando pa l outro lhado, mas nun hai modo de achar agarradeiro; assi i todo nun chega a ser un zaspero, que la bida nun mos deixa salida a nun ser lhebá-la a las cuostas.



segunda-feira, 10 de maio de 2010

Odas de Ricardo Reis (060)

Nun solo bino, mas nel l oulbido, boto
Na copa: serei cuntento, porque la dita
Ye çcoincedora. Quien, lhembrando
Ou adebinando, sunrira?
De ls brutos, nó la bida, senó l’alma,
Cunsígamos, pensando; arrecolhidos
Ne l amplacable çtino
Que nun spera nien lhembra.
Cun mano mortal upo a la mortal boca
An salagre copa l passageiro bino,
Baços ls uolhos feitos
Para deixar de ber.

[an Pertués:

Não só vinho, mas nele o olvido, deito
Na taça: serei ledo, porque a dita
É ignara. Quem, lembrando
Ou prevendo, sorrira?
Dos brutos, não a vida, senão a alma,
Consigamos, pensando; recolhidos
No implacável destino
Que não spera nem lembra.
Com mão mortal elevo à mortal boca
Em frágil taça o passageiro vinho,
Baços os olhos feitos
Para deixar de ver.]



terça-feira, 4 de maio de 2010

diário 50


naquel anho chobiu cumo nunca se bira i nun habie meia de la tierra se zaugachar; sembrei un alegrete de cebolhino i, quando yá iba capaç de poner, nun habie meia de la tierra quedar capaç de assucar; nunca quemi tanto cebolhino an dies de mie bida, que yá nun staba an eidade de lo ir a bender por esses pobicos i feiras; al modo que l fui antressacando, botou-se a crecer cumo se houbira sido demudado para ua llheira a la própia: nunca se me criórun cebolhas tan grandes, cumo cabeças, i nien un cachico queimonas; al ampeço inda agarrei ua rela, mas apuis dixe acá para mi, mas porque me hei de star a relar por bias dua lheira de cebolhino?; por todo l santo berano, la tierra augachada secou-se a un punto que quedou toda de dientes arreganhados i apuis fui a mi que me dou la risa: hai que deixar l tiempo fazer l sou trabalho, que sbarrar-mos de caras acontra el solo puode dar an nada ou anton an rábias sien remédio.



segunda-feira, 3 de maio de 2010

Las maias

L purmeiro de maio, antre muitas outras cousas, ye die de comer las maias, que ye l mesmo que dezir, comer castanhas robidas. Nun ye fácele nesta altura de l anho inda tener castanhas sanas para comer i cada un serbie-se de las sues albelidades pa las cunserbar, nun tiempo an que nun habie modo de las ancarambinar. Para quien comisse las maias nun le dolie la cabeça an to l anho i la giente nun deixaba mesmo de las comer. Assi me passou a mi astanho an que la mie amiga i cunterránia Lúcia Colona que dou ua cacha dessa malzina contra l delor de cabeça. Talbeç a mi me baia a doler bárias bezes la cabeça, mas esso poderá ser de la falta de fé, essa pilma que tanto falta i tantas malinas ajuda a sanar. Poner assi la fé an cousas simpres de la bida, cumo tal castanhas, ye ua questume que mos achega de la eisséncia de las cousas i de la bida que todo debemos de fazer para nun perder. Tamien por esso, nunca será demais amentar nas maias.