nuoba quadra de FR

quando las buonas palabras
de buono yá tráien pouco
solo las malas son buonas
que a outras ye l mundo mouco

//

quando as boas palavras
de bom trazem muito pouco
apenas as más são boas
que às outras o mundo é mouco

FR

outra quadra de FR

la fuorça que tantos pónen
a ourdir tanta maldade
bundarie para que l mundo
fura guapo, de berdade

//

a força que tantos põem
a tramar tanta maldade
bastaria para o mundo
ser bonito de verdade

FR

ua quadra de FR

puode haber pequeinhos cielos
andrento grandes einfiernos
cumo la calor que fazes
ne ls rigorosos eimbiernos

//

pode haver pequenos céus
dentro de grandes infernos
tal como o calor que fazes
nos rigorosos invernos

FR

Çpedida

Bai-te anho, que yá nun tornas
a tener outr'anho tou:
mas bibirás porque bibo;
quien bai morrendo sou you

al modo que ls anhos pássan
cua mui grande admirança:
al modo que quedo bielho
un tiempo nuobo m'alcança

i me fasta de ls antigos;
nun te pago l que me deste,
puis nunca saberie cumo,
mas ne l que an mi te quedeste

spero fazer buona paga:
todos te mándan ambora,
mas you, nun sei bien porquei,
tengo algo andrento que chora.

Ye l tiempo que sembra an nós
angúrrias i remissacos,
delores, miedos, i suonhos,
pelo rúcio, i chenos sacos

de lhembráncias, squecimientos;
de todo quédan-mos nadas
an que mos bamos çfazendo
al son de las airaçadas.

Cumo pesa l nunca mais,
esso si, ye la mie muorte,
que an mi se bai antranhando
(bibir tamien ye ua suorte)!

Fonso Roixo

Jó

Se cuidas que tue malina
arrepassa las de Jó,
abre ls uolhos i l que bés
lhougo te dirá que nó.

Fonso Roixo

Byblos

Fui guapa cidade antiga
i apuis un lhibro serie:
mas talbeç naide sperasse
que hoje fura lhibrarie.

Fonso Roixo

Pedidos

Nunca sei porque me píden
cousas que nun puodo dar:
darie-las se you podisse,
a quien percisa, a la par.

Fonso Roixo

Anhos

Quando apagueste las belas
anriba de l bolho d'anhos,
deixeste la lhuç de ls dies
a lhuzir contra ls zanganhos.

Ls anhos que bou fazendo
son lhuzicas que colguei:
faç-me bien cad'anho ir bendo
ls cachicos que alumbrei.

Fonso Roixo

Mar

Binte anhos l manginei
óndias, noufraijos, quelores;
quanto del li só guardei
probes bidas i delores.

Siempre gustei mais de tierra,
i an beç d'óndias altaneiras
mais quiero chubir la sierra,
pisar de to las maneiras.

Fonso Roixo

Querer

Nun bonda querer tener
I sien querer nun hai nada,
Mas que adelantre l querer
Se l que l querer quier ye nada?

Fonso Roixo

Formiga d'ala

Formiga d'ala [retrato de Carlos Ferreira]

Negros uolhos son dous mundos
Q'alas ber déixan las benas
Arma l picanço sou salto,
Patas cuntínan serenas

Nin beio que se deféndan:
Yá fuora de l formigueiro
S'a la lhuç bola un cachico
Cunquistou un mundo anteiro:

Nun há de ir an carreiron
Nin l'amporta l çubiaco:
La fábula nun ye deilha
Nin subre eilha çpeija l saco

De cantigas la checharra:
Fidalga, cumo un narciso
Mira la seda an sues alas
I perde todo l juízo:

Deixa l buraco i la tierra,
Ansaia un bolo bien fuorte:
Bibe mágico un sfergante,
Apuis nun teme la muorte.

An sues alas, cumo un speilho,
Puode-se ber to la gente:
Bonda un bolo dun segundo
I queda l mundo defrente.

Fonso Roixo

Quadras

Ye de nuite! Bien que querga,
Por muito que tenga gana,
Por bien que ls uolhos afirme,
Nunca beio la manhana!

Hai cousas que, nun las bendo,
Cuntamos cun eilhas ciertas:
Nun béien ls uolhos, mas bénen
Culas eideias abiertas.

Fonso Roixo

Lhágrimas

Solo cuorren quando quieren,
Ban-se i bénen sien lhicença:
Por fuora son siempre armanas,
Só nós le bemos la çfrença.

A las bezes son palabras
Que nun hai, pa mos dezir,
Son outras bezes anúncios
De ls delores por benir.

Duolen se cuorren andrento,
Sóltan-se s'an nós nun cáben:
Árman cada mundiada
Que naide bei, mas bien sáben

Las fuontes donde eilhas nácen
Que apuis deilhas outros somos,
Assi cumo un tuoro znudo
Yá sien polhas i sien gromos.

Queda solo la cabeça,
Cun gana de arrebentar
I l tiempo, esse almanecha,
Lhougo aparece a cobrar

La maquila, sien perdon,
I nós mal damos por esso:
Ye l pensar q'ambaralhado
Cul peso queda mais spesso.

Que balerá ua lhágrima?
Quien sabe, se eilhas nun déixan
Camino i mos tuolhen... Ls uolhos,
De nun aguantar se quéixan.

Parai, parai de smelmar
Cogulhos que l tiempo ajunta:
Nun lhebeis l'alma cun bós,
Nun deixeis tanta pregunta!

Puoden bien anhos tardar
Sien salíren a la rue:
Por esso, quando s'amóstran,
La cara ye toda sue.

D'alegrie ou de delor?
Nó, d'alegrie nunca son:
Ou duolen ou son d'amor
Donde l delor mais se pon.

Fonso Roixo

Lhéngua

Uns dízen que yá se muorre,
Outros que eiterna será:
Se uns i outros nun la fálan,
Morré-se ou nó tanto dá!

Fonso Roixo

Sien abrigo

Drumie an squinas, que solo
Era l cielo casa sue:
De nuite dolie-le l cuorpo,
De die dolie-le la rue.

Fonso Roixo