Que nun haba rábia

Que nun haba rábia,

que nun haba malandrice,

que l fuogo einútele s’apague;

que l home chuba,

que l home abaixe,

de l brício até la muorte, sereno.

Que nun haba rábia ...

Poema qechua

[serbi-me de la traduçon castelhana de José María Arguedas]

Pachacamac

Á Tierra Mai!

A tou filho,

l Inca,

aguanta-lo

anriba de ti,

sereno

i an paç.

Poema/ouracion quechua

[serbi-me de la traduçon de

Cristóbal de Molijo ‘el Cuzqueño’, 1573]

Çpedida

Nunca te squeças, miu pequerrico,
nunca te squeças!
Cabeço branco,
faç-lo bolber;
auga de la muntanha,
ourrieta de l balhe,
que nunca se muorra de sede.
Gabilan, lhieba-lo an tues alas
i faç cun que buolba.
Niebe sien fin,
pai de la niebe,
nun lo firas ne l camino.
Aire malo,
nun le topes.
Auga de termienta,
nun lo agarres.
Nó, á faia,
terrible faia,
nun lo agarres çprebenido!
Miu filho,
hás de tornar
hás de tornar!


Poema an lhéngua quechua.
[Serbi-me de la traduçon castelhana de José Maria Arguedas, salida an
Lhiteratura Qechua, de Edmundo Bendezú Aibar, ed. unibersitária, Lima, 2003]

Homes de passaige

Nun quergas filha mie a homes de passaige,
a esses biandantes que bénen de pobos stranhos.
Quando tou coraçon stubir cheno de ternura,
quando an tou peito tubir crecido l amor,
esses homes stranhos daran meia buolta i deixaran-te.
Mais quergas amar l'arble de l camino,
la piedra que alharga sue selombra porriba la tierra.
Quando l sol ardir porriba tue cabeça,
quando l'auga que cai molhar tues cuostas,
l'arble dará-te sue selombra doce,
la piedra un sítio seco pa l tou cuorpo.



Poema tradicional inca.
[Ousei la traduçon feita de l quechua pa l castelhano por José María Arguedas (1934)

in Literatura Quechua, ourganizada por Edmundo Bendezú Aibar, Editorial Universitaria, Lima, Peru]