dito 67

soledade nun ye star solo, mas nun sperar por naide

dito 66

nunca tenerá amigos quien nun fur capaç de ber ne ls outros l que ténen de melhor.

dito 65

se solo craticas ls outros, para un cachico i pregunta-te: que porblema tengo cumigo?

dito 64

nunca mais sales l mesmo de puorta por adonde entres: algo deixas, algo trais.

dito 63

pones tue sprança nun die de manhana i squeces que solo an ti puode star, hoije.

ditos (62)

quei puode l cielo azul contra las nubres que lo tápan, senó cuntinar para alhá deilhas?

//

que pode o céu azul contra as nuvens que o cobrem, senão continuar para além delas?

ditos (61)

deixa lhamber las feridas: nun cura, mas atama l delor i bai las lhimpando de costras malas

ditos (60)

se sultares la rábia, apeia la lhéngua.

ditos (59)

demudar l mundo fui tou suonho, mas squeciste te de ampeçar pula punta cierta: tu!

ditos (58)

aprossimaçon a l'aternidade: l que ua beç ameste, nien an zamor te deixa

ditos (57)

perdes tou Natal, se negas l Natal que puodes dar.

dito (56)

anganhar nun ye sperteza, mas la cobardie ne l sou melhor.

dito (55)

stás ciego se na cinza nun sós capaç de ber l fuogo que la fizo.

dito (54)

inda que nun beias cumo esso puode ser, nunca deixes de acraditar que ls dies de manhana te puoden cuntinar a dar horas felizes: ampeça yá a purpará-los.

dito (53)

se fur lharga de mais la nuite, senta-te anriba deilha cumo piedra adonde çcansas de lharga caminada:ganharás fuorças pa la madrugada.

dito (52)

nun speres aprobaçon na bida cumo an eisame, mas nien por esso deixes de lhuitar pula purfeiçon an todo.

dito (51)

nada speres de quien nada spera.

dito (50)

ua casa assenta an bários pedamiegos: puodes pensar que l tou nun ye amportante, mas se l sacares la casa sbarrulha-se.

dito (49)

se un die te dir la gana de te 'ires abaixo', mira purmeiro alredror i cunta las pessonas que se stríban an ti para nun se 'íren abaixo': berás que nun te faltaran fuorça para te aguantares.

dito (48)

la fruita que quemiste outros ponírun l'arble: nun deixes de poner ua arble inda que nunca le bengas a quemer la fruita: se podires, nun ye buono que deixes díbedas por pagar.