oubes martelhar, de die i pula nuite, fázen l caixon de l tou paíç,
cumo nun te dás de cuonta que tamien sós carpinteiro?
bés passar l'antierro de l tou paíç,
cumo nun te dás de cuonta que tamien bás andrento l caixon?
alguien palhestra subre quien matou l tou paíç,
cumo nun te dás de cuonta que tamien tenes na mano la faca ansagrada?
yá na foia, liste l que alhá screbírun: matórun este paíç.
ende te deste de cuonta que este paíç era l tou i por esso screbiste: suicidemos-mos.
quando, un die, biste rucecitado l tou paíç, al ber cierta giente pregunteste:
cun que dreito benírun estes a la fiesta, se nunca ua mano le botórun?
Subscrever:
Enviar feedback (Atom)
2 comentários:
suidade de miu paiç! De froles, de l'aire, de benir a camino, de oubir la boç, la palabra que se antende. Ye berdade que se antende la calor de l coraçon mas chegar eiquei i oubir i ler i dezir que a la fiesta benírun ls muortos i que da foia salírun a cantar dezindo, biba pertual!
un abraço arrochado,
ac
Bien benido Antonho, a este paíç que ye l nuosso i por esso, tenga ls defeitos que tubir, tenga bien porblemas que resolber, nada hai que se le acumpare.
Un abraço arrochado,
A.
Enviar um comentário