segunda-feira, 14 de junho de 2010

inda mos crécen anteiras las risas

ye puls tous anhos que me bou bendo al speilho
de l mundo, a la nubrina de ls suonhos desse
tiempo an que tamien you tube trinta anhos:
inda mos crécen anteiras las risas, que
la muorte nun abriu sues alas de selombra
i a cada die mos nácen manhanas de gana
para ancundesar ne l çurron de ls dies de fame;


agora tengo la tue eidade an doble
cumo se, culs anhos, houbira quedado
mais nuobo: mas nun hai cuontas que angánhen
l tiempo ou plásticas que lo apáguen; ye
inda cedo pa mos crecer l carambelo,
que tiempo nun faltará pa benir l friu,
ables nuossos pies pa l puolo de ls caminos;


la cinta de la bielha abaixou a tenhir
las bordas de ls caminos, mas nun tarda ende
l berano i tenerá que asperar las augas
para que puoda amostrar sue risa clara:
deixa que ls anhos báian i béngan, nun
fagas muito causo deilhes porque nunca
te han de chamar a pedir l'oupenion,
que democracie nun ye balor ounibersal.





4 comentários:

Abelhón disse...

D'onte nun anho.
Abraços al pimpon.
A.

AF disse...

Buonas nuites Abelhon,

Anton de hoije nun anho.
Un abraço tamien para ti.

A.

ACangueiro disse...

Alas que bolaran, risos que quedaran spindorados un bolas ambaixo de pinos na lagona d'albufeira; tiempos que foran, nuobas que bengan i até pal anho.

un abraço,
A.

AF disse...

Ei Antonho, la Lhagona de Albufeira, adonde eilha yá quedou...
até pa l anho.

Abraço,
A.