quinta-feira, 16 de abril de 2009

l outro lhado



parece siempre claro l lhado adonde mos póusan ls uolhos: queda outro lhado adonde nun se bei, outros lhados, que muitos puoden ser : uns zmaiados an sue eisséncia de selombra, zlidos nun cinzento ouniforme que todo cunfunde i armana, outros tanto alhá de l anglo de bision que nien se dá por eilhes; stou nun lhado solo i beio de sue maneira cada lhado inda quando todos beio al mesmo tiempo: criemos palabras cumo certeza i berdade, para bolarmos nas alas dessa fame sien fartura de mos querermos diuses: somos, stamos, bemos siempre l nuosso lhado, l nuosso mundo, l nuosso ser: porquei, antoce, tanta stória de dogmas, de fogueiras, de campos de stermínio, de relegiones berdadeiras, de diuses únicos berdadeiros, de ountologies a ampestar la bida? nun sei cumo se chama a essa malina que mos mata, essa que mos cumbince de todo bermos quando bemos l solo nuosso lhado: mas, sin nome i todo, eilha eisiste i nun ten cura: saber que eisiste an nós yá ye un modo de l'atamar.





2 comentários:

Scalhabrés disse...

Diç que Thomas Edison dixo ua beç que nun se anganhou nunca al tentar ambentar la luç eilétrica. Dixo que las bárias tentatibas fúrun si passos i sien eilhes nun chegarie a acertar. Son passicos "assi cumo quien bai de camino" :-) até chegar al melhor modo. Eiqui nun se puode dezir ua cousa que se scuita a las bezes:"nunca la cargaremos". Pus l camino ye solo mesmo un, l que l mirandés seguir. Nien que l passado seia mei "çcoincido". I acradito que anda por ende, tal cumo pa Edison, la luç. Nien que seia bien pequerrixa, bien ne l fondo de l túnel. Alhá chegaremos ó alguien chegará.

Abraço,
Cecílio

AF disse...

Cuncordo cuntigo, amigo Scalhabrés: l camino faç-se cun passicos tan pequeinhos que nien mos damos de cuonta i na fin todos cúntan pa l resultado, sien eilhes hada haberie sido possible. Ye berdade que l camino ye solo un, mas esso nun ampide que tenga muitos lhados, muitas paredes, puontes, alcadutos, etc., muita giente a caminar que bei sou lhado: hemos de alhá chegar, mas hai muito modo de chegar; se chegarmos todos ye mais debrebe i melhor.

Bien haias por todo i por essa tue fé. Abraço,
A