quarta-feira, 2 de maio de 2012

liçon de giografie


a las bezes dá me ua gana 
de campanas 
que tengo de cerrar ls uolhos i 
deixar que béngan cun sou 
sonido fondo lhargo
a arrolhar me la nuite 
a spertar me jogos de 
fin de die antes las Trindades


a las bezes la gana que tengo
de campanas
trai me outro que yá fui
un tiempo an que la sola culidade
que le beio ye you ser moço
i nun querer saber 
de campanas 
para mesmo nada


antoce nun sei porquei esta gana
de campanas
me badalha na cabeça
se quanto me chama
ou adonde quiero ir
nada ten que ber 
cun campanas
ou algo a que puodan star liadas


ye este un gusto triste l
de campanas
que me lhieba an sou bolo raso
por prainadas arribas i
por montes por ribeiras i
cabeços a puntos de l toque 
de campanas
nun ser sonido yá, mas pura giografie







2 comentários:

caminante disse...

Tengo seguido la buossa scrita an mirandés i ten sido assi que tengo aprendido un pouco para agora me botar an bolo raso na lhéngua que tanto amo, la mie primeira, l mirandés.

Bien hábades

Amadeu disse...

Ei caminante, gusta me esse nome que nun deixa agarrar aranheiras i porclama l'houmildade de ber, coincer i tener an cuonta mundos nuobos, aqueilhes adonde mos lhieba l camino, hai quien le chame bida.
Ye un gusto mui grande recebir nets mie casica. Buolbe siempre.
Abraço
Amadeu