scribo cumo bózio por mi mesmo

busco l que fui, agora feito
an cacos que nun sou capaç d'ajuntar yá,
puis outra proba d'eisitença
nun tengo para alhá de la mimória:


scribo cumo bózio por mi mesmo,
esse que me perdi un die
nun sei bien quando, adonde,
tantos sou ls muortos que an mi bíben,


nien sei cumo a todos dou aguanto;
la boç que fui, ls uolhos, ls miedos,
ua mundiada de géstios, risas, delores,
spantos: nesso bibo, menos an mi.