sábado, 2 de fevereiro de 2013

eiterna ye la música


fiç esta moda a que le falta la música, mas puode ser que alguien se la querga amprestar; pormeti se la a ua amiga que se morriu i me deixou un recado: quien se muorre sabe que, assi i todo, la bida ye guapa
//
fiz esta canção a que lhe falta a música, mas talvez alguém lha queira emprestar; prometi-a a uma amiga que morreu e me deixou um recado: quem morre sabe que, apesar de tudo, a vida é bela

lhieba cuntigo la fraita
que ampeça la primabera
l tiempo por nós nun spera
lhieba cuntigo la fraita
cumigo stá la mie gaita
l tiempo por nós nun spera

tengo ua moda ne l peito
que de ls aires recebi
i an sues óndias me perdi
tengo ua moda ne l peito
que me deixa assi sien jeito
i an sues óndias me perdi

un die ben cul aire de riba
canta outro die ne l de baixo
an to ls aires you l’ancaixo
un die ben cul aire de riba
l galhego i l touro abiba
an to ls aires you l’ancaixo

renace a cada manhana
nun s’agarra a nanhue boca
an to las cousas se toca
renace a cada manhana
anque triste ye cun gana
que an to las cousas se toca

son ls cerrados un retombo
yá ls freznos bózian sou berde
la bida nunca se perde
son ls cerrados un retombo
que acumpánhan caixa i bombo
la bida nunca se perde

nunca se calha la bida
la moda que mos goberna
que ye sue música eiterna
nunca se calha la bida
renace apuis de perdida
que ye sue música eiterna

uns se ban i outros bénen
solo queda de berdade
la música n’eiternidade
uns se ban i outros bénen
i queda de quanto ténen
la música n’eiternidade

mira ua fuolha que bola
dando alas al delor
hai risas an cada flor
mira ua fuolha que bola
só tue fraita me cunsola
hai risas an cada flor

1 de febreiro de 2013
Fracisco Niebro





Sem comentários: