domingo, 15 de fevereiro de 2009

oubistas ou ua paisaige defrente



quien bai pula tierra de Miranda, atrabessa l praino i lhougo se dá se cuonta que ye aparecido a todos ls prainos; bei l Douro i sues arribas de grima, mas sabe que esse riu nun nace nin zauga eilhi; mira las nubres a passar, que bénen i ban i sabe que nada mais son que nubres; l aire cuorre para loinge, cumo aire que ye; l sol assoma-se i çcarrega sou rechino, i nien quier saber de la tierra de Miranda para nada; las bistas al loinge, las arbles, la giente, las casas, todo cousas que quédan ne ls retratos i (quaije) nada de nuobo tráien cun eilas; mas se l biajante apurar l oubido puoden chegar-le sonidos que nunca oubiu, que talbeç nien antenda i essa paisaige sonora bonda para que diga: esta tierra ye defrente, oubistas cumo estas nun hai an mais lhado nanhun; sien alma quedarie la tierra de Miranda se se calhara sue lhéngua.



2 comentários:

AM disse...

Sien alma quedarie la tierra de Miranda se se calhara sue lhéngua.
Mui guapa esta passaije...
Nós nun queremos que quede!
Beisico
Adelaide

Amadeu disse...

Bamos a ber se somos capazes.
Cuido que se quejirmos todos, i quejirmos de berdade, hemos de cunseguir.

Beiso
Amadeu