domingo, 28 de agosto de 2011

las yerbas de Castrotorafe


Castielho de Castrotorafe i l Esla [Alcides Meirinhos 2011]



finolho, cardos, canhafrecha i outras yerbas

que nien un anho bíben, por seclos
fúrun mirando la grandura daqueilhas
muralhas, la dureç de sues piedras,
assi i todo dreitas an sue houmildade,
cuntentas de sues froles, acupadas
a ancarrapitar por sous cúrtios beranos;

passórun andefrentes las augas de l Esla,
antretenidas an sous remansos,
a fazé-le cuçquinhas als puntones de
la bielha puonte romana, prouista de
reis, reinas i bispos que la pisórun,
bena a lhebar sangre al castielho i
a sue argulhuda cidade;

l tiempo nun deixou de passar,
finolho, cardos, canhafrecha i outras yerbas
cuntínan agora, anque nien dúren un anho,
mas las augas de l Esla yá nun cuorren lhibres
i la dureç de las piedras ye agora
arena i tierra, las altas muralhas un
sbarrulho ou solo un buraco lhargo,

sue eigreija un bózio de silenço
triste, i nien feitiços de puonte
cun sous
reis, reinas i bispos,
çfeitas ou
perdidas yá las monedas
que serbien de paga: ls uolhos solo muorte
béien i nun acéitan que la giente cuntinou
a bibir deilha,
esse segredo que bince l tiempo:

antendemos la bida que, seclos apuis,
une las mesmas yerbas, mas
nun aceitamos que ye l mesmo
filo a ounir la giente, esse filo
a que le chamamos stória:
las yerbas puoden ser outras a cada anho,
mas nós... queriemos star siempre eiqui!





2 comentários:

Marcolino e Mara Cepeda disse...

Olá,

Ontem tentei comentar este belíssimo poema em mirandês e não consegui.
Tenho, realmente, de aprender.
É muito interessante a forma como comparas a singeleza e efemeridade das flores com a durabilidade da pedra.
Acredito que as partículas que nos compõem fazem parte do universo desde o princípio dos tempos e que com a minha morte, voltarão a fazer parte do mesmo universo, portanto, nesse sentido, estaremos sempre aqui, como microscópicas partículas.

Amadeu disse...

é isso Mara, sem tirar nem pôr.
mas nós temos dificuldade em aceitar isso e gostaríamos de estar sempre aqui, mas não «como microscópicas partículas» e sim como agora estamos, tendo dificuldade em perceber e aceitar que esta nossa forma é passageira: sempre fizemos e faremos parte do universo e isso nos devia bastar.