munha (7)

quien creciu ambaixo teilha bana fui criando ua relaçon mui cercana cul telhado de la casa, anque muita giente agora nien saba l que ye a nun ser por fuora, mas teilha bana ye l telhado por andrento, ua cousa hoije tan eisótica que ye custoso antender cumo el mos traie cousas únicas [claro que hoije ye todo mais heigiénico i mais cunfortable, nun squeço esso]: quando chobie, las boteiras éran ua cunsemiçon i habie que le poner un baldo ambaixo a apará-las, esso quando a fin de berano nun se le daba buolta al telhado cumo debe de ser, mas nun ye de boteiras que eiqui quiero falar, anque tubira que las lhembrar para que naide pense que datrás era todo un paraíso, bien al alrobés; quedar a la nuite, spierto, de barriga parriba na cama i mirar ls buraquitos por adonde antraba ua pouquita de lhuç de la lhuna, puis inda nun habie eiletracidade n'aldé, i adebinar las streilhas para alhá l telhado ou ua andeble claridade nas nuites an que las nubres nun deixában que la lhuna s'assomasse, sultar ls miedos i acabar por se deixar drumir ambaixo las mantas, que tamien tapában esses miedos; spertar a la purmanhana i ber todo branco de la niebe buraqueira, mas calentico ambaixo las mantas i deixar-se quedar, mei spierto mei a drumir, ressonhando sien priessa, ls buraquitos de l telhado a lhuzir cumo se fúran lhuzicas ou strelhicas de adonde l friu benie bolando cun sues alas de carambina; ber ua spada de sol a antrar pul telhado, cun muita polareda a beilar, a beilar sien parar, la casa a la selombra i aqueilha lhuç eilhi a atrabessar todo, aparacida als zeinhos que amostrában raios de lhuç a benir de l cielo, mandados por dius, i you a pensar que aqueilhes raios de lhuç nun passában dua fraca eimitaçon de la frecha de sol a atrabessar la casa, amparada pula teilha bana, i inda hoije quedo spantado de cumo la lhuç colada pulas teilhas se me bolbie an questiones filosóficas tan altas que nien me daba de cuonta.