Assomadeiro 26

Quedou-se, ls uolhos parados i abiertos: nun bie nada i, l que naide dixo, oubie. An que mundo bótan raiç estes sonidos? Que spritos pássan por nós i mos agárran, fazendo de nós outro? Cumo son scruros estes assomadeiros, que nien una lhuzica acéinhan... Quando you era pequerrixo, mie bó ponie siempre, al meio las nuites de las cuontas, ua lhuzica mui longe, a la punta de riba dun cabeço: l personaige de la cuonta iba siempre a tener cun essa lhuzica, ancandilado, i era ende que todo ampeçaba. Agora sembremos l mundo de lhuzicas, de nuite i de die, ne ls montes i ne ls balhes: mas nada ende ampeça, nada para alhá se bei, se ls uolhos quédan parados i abiertos a oubir big bangs que inda nun se dórun, mas yá mos ban lhebando cun eilhes.