... i outros ban se

Bien te asperei a la punta de riba de l die, mas nun chegueste a benir. Fui cumo se un cacho de mi se tubira ido ambora, a fazer caçuada deste cuorpo an que me colgo: puode l poço dezir, esta auga ye mie, se cuorre pula augadeira a cacharron...? Deixa te ir, esto sou you a pensar, natural cumo l bolo ye nun páixaro. Inda acá queda l tou sítio, siempre caliente, i bonda para fazer de cuonta que todo an mi quedou anteiro. A ua hora destas, a quien le bou a dar a ler este testo, ls testos que scribo cumo belhetes d'antidade que a cada die bou acrecentando? L rugido de ls altemobles, na rue, aplaquiou i solo me queda la nuite pa le fazer ua festica cul uolhos. Mais calhados quedórun ls lhibros, mais peganhento l puolo, mais xatas las paxarinas a antrar pula jinela mei abierta. Até l silenço se puso molhieço, cumo cousa que se maçca i nun s'angulhe: assi, bai a ser mais custoso sentir que la manhana yá chube las scaleiras de l die, i ls morcones, si, ls morcones, a ber se nun chégan a ganhar mofo na fruiteira. Quando tornares, entra cun sereno pula puorta cumo se nunca tubiras salido i la calentura de l tou sítio nun se haia zafeito de l oulor a fresco. Ye tamien eiqui l sítio de la mimória, a que tamien chamamos casa, adonde puodes cuntinar a fazer ua carteira de lhembráncias. Tamien you un die sali - fui hai tantos anhos! -, i por bien bezes que baia, nunca mais tornei. Nunca naide mais torna al sítio de adonde ua beç saliu: a cada beç que ateima an tornar, l sítio demuda cumo se alhá chegara pula purmeira beç, anquanto l outro sítio, de adonde un die saliu, s'anobielha ne l cuolho de la mimória. Ye la mimória essa casa a que siempre tornamos, la única que mos premite dezir, a cada die an que mos bemos al speilho, que aquel somos nós.