terça-feira, 18 de novembro de 2008

segredos


l segredo cun que acabas nun me dizes: un die has de bibir tou fin, i esso bonda, deziste-me; ye berdade que l fin nun manda mensageiro: sós tu a decidir l ampeço de acabares; you talbeç tenga uns meses, uns dous ou trés anhos: mas tu siempre cuidas que son ls dies i ls anhos strada adonde passas; quei fago?, stás siempre a preguntar: boto-le cuontas al que passei, sento-me a la brigada, incho-me de sol i aspero que béngan ls que amo: nunca le poderei dar de l que me sobra, que m'arramo an delores, spertinas, frius, faltas de gana para todo, esse binagre an que me reçumo; a eilhes, l que l miu cuorpo yá solo puode fazer quando se dá, dou-le, salindo de mius lhemites; anquanto spero, bou cumponendo la risa que hei de fazer, ambentando l que nunca dei, ansaiando pequeinhos géstios que inda me sou capaç, crecendo-los an gigantes; l mais de las cousas yá nun ampórtan, ou, talbeç, yá nun amporta l que amporta; cumo solo bénen de tiempos a tiempos, tengo fartura de bagar pa me achir de speras i aplediar pulas benidas, cumo ua manhana; inda nun chegórun i yá nun penso noutra cousa, ye todo inda mais fuorte que la chegada, assi cumo la fortaleza de l aguemito que antes de me chubir neilha me puxa la carreira; porque habie de haber segredos se te queda, l que bibes, a la muostra? yá agora te acabas i nien te dás de cuonta, porque çprézias l tiempo que te lhieba al cuolho; an todo l que ye eissencial nunca hai segredos: puode la fuonte fazer segredo de sue auga i cuntinar fuonte?!



4 comentários:

faustino.antao disse...

Segredos......
Hai xufrimiento nestes segredos, siempre se xufriu an segredo!!!!
Que sei you!.

Anónimo disse...

"puode la fuonte fazer segredo de sue auga i cuntinar fuonte?!" - singular perspectiva, magnificamente desenvolvida. Não serão, os segredos, a sede de se revelarem? Um dia, escrevi algo nesse sentido... embora por outras palavras. Grata por mais uma fascinante leitura,
Alexandra

Amadeu disse...

Oulá, amigo Faustino,

Hai quelores a que le chamamos quelores bibas, mas la berdade ye que todas las quelores fázen parte de la bida. You dezirie que hai bidas nesses segredos, i ua fuorça sien fin: hai pessonas que ténen, cumo tal 90 anhos, i bótan ua alegrie que alumbra mais que l sol. Essa ye ua licion de bida que stá para alhá de l sufrir, que cunsigue star para alhá del. Adonde stá l segredo?

Un abraço,
Amadeu

Amadeu disse...

Oulá Alexandra,

Al menos para eilhes mesmos, ls segredos nunca son segredos. Segredo ye cada un de nós, pus se diç, mais que por palabras, bibindo; scolhemos bibir assi, i l segredo nunca ye la scuolha que queremos scunder i nun podemos, l segredo ye la raiç i rezon de la scuolha. Si, essa sede que an que se cunsúmen ls segredos ye la bida an que se amóstran.
Bien haias por haberes benido,
Amadeu