nun m'antrúbies las palabras

senta-se an ti
un silenço a bordar
ls dies acoquelhados,
palabras derretidas
a friu:

ye quando s'upe
ua nubrina de sentidos
i als uolhos se t'assoma
un uoco,
ua cinza de outro fuogo

ye un tiempo de pingas
ralas que l aire
abana nas aranheiras
cun que bistes
l outonho que ende ben;

cumo fui para
squeceres tue morada?
nun me puxes pula boç:
spera, que l delor
ha de passar;

nacie l sol
na lhuç de ls uolhos,
suoltos cumo ua spera:
assi i todo fondas,
las palabras guárdan
l tagalho de manhanas
adonde se t'assóman las preguntas.

nun m'antrúbies
las palabras,
la clareza anteira deste die:
para dezir l lhodo
nun te ha de faltar tiempo
i abrir la fuolha de las horas
cumo ua palaçuola.