un die

un die,
- quando será? -
hei de tornar
a estas peinhas estas faias,
ala de aire feito,
siléncio lhargo,
lhibartado yá de palabras,
suolto de angúrrias
que l tiempo arressaiou
na piel de la tierra:
starei por ende, calhado
antre flor de xara i belhotrico de nebro,
até que sperte l Riu
cun sue corriente i sous cachones,
muito para alhá las oulibeiras:
quien habie de guardar cantigas i sudores,
sgodar la negra mancha de fames
arrolhar carinos que fazien las huortas
cun sue raiç ne l Riu?
ne l riu de l squecimiento eiterno
serei auga, piedra ou tierra,
talbeç flor passageira,
pura cuntemplaçon sien uolhos
ne l lhargo i debagaroso
resfuolgo de menos que un granico
de mundo.