terça-feira, 11 de setembro de 2007

Guarda ls anhos...



Para miu pai, que fizo hoije 86 anhos



Guarda ls anhos, que de ls seclos
trato you: lhiebas la palma
ne l menudo tiempo adonde
stan ls cebadeiros de l'alma.

Lhougo an nuobo t'afaziste
a la grima de las faias
i deilhas siempre te riste:
mira, agora, nun te caias!

Que adelántran muitos anhos,
se nun houbir denidade?
Tu, que la tenes de sobra,
bibe sien tiempo i eidade.

10 de Setembre

3 comentários:

Ana disse...

Un feliç anibersairo para sou pai, Amadeu i muitas felicidades para ambos dous. Bamos a ber se nós tamien somos capazes de atingir essa eidade mas cá para mi, la poesie tamien ajuda... Poesie de la bida !

Amadeu disse...

Oubrigado Ana, pulas tues palabras.
Deseio, para ti i pa ls tous, l mesmo an doble.

AF disse...

Permite-me outro comentairo Ana, yá que falas de poetas i ende nun sei se stamos d'acuordo:
- tengo l'eideia de que l mais de ls poetas nun bíben muito: bíben mui debrebe i la bida lhougo se le gasta; cula fame, até la bida cómen; an beç de arder debarico, cumo la içca, déixan-se arder an claro, sien parar, cumo fornalha adonde se derríten. I nun beio que seia possible fazer algo por eilhes, ls poetas.
«La poesie de la bida», de que falas, talbeç seia defrente... nun sei bien.