(Diário tardiego dun fumador an suspenso 8)
Bários jornales i la telbison dórun onte, a respeito de l Die de Reis, la notícia de que habie ua tierra de l cunceilho de Mirandela adonde ls garoticos podien fumar, nesse die. I acrecentaba la notícia que até éran ls pais i outros adultos que ls animában a dar uas puxadas i até aparecie ua abó que le daba denheiro al nieto para mercar cigarros. Un tiu de mais de uitenta anhos dezie que se lhembraba de siempre haber sido assi essa tradiçon. Nas eimaiges que passórun na Telbison alhá andaba l tiu Aureliano Ribeiro, de Custantin, a tocar la gaita pulas rues de l'aldé. Essa questume esiste ou eisistiu an muitas aldés, an que siempre se dórun cigarros a todo mundo ne ls dies de fiesta i outros dies nomeados, cumo tal casamentos i batizados. Esso ye l que se me lhembra, de quando you era garotico, an relaçon a la mie tierra. Daba-se un cigarro, un doce, ou ua copa de algo ou ua ambuça de antramoços. I se habie mais do que ua pessona a çtribuir cigarros i se un yá stubira a fumar, inda podie sacar outro i poné-lo na oureilha: amostra a ber esses de quales son; á, esses son de ls lhargos, i ténen filtro; esses son de ls caros, bota acá un, apósque nien Cacharuolo ls bende. I outros ditos cumo estes s’oubien. Nun se me squece dun amigo miu, éramos garotos, que le fui a pedir lhume al pai, i este alhá tubo que se l dar inda que le custara. You nun passei por façanhas cumo essa de l miu amigo, porque siempre fui algo ambergonhado an relaçon a essas cousas públicas. L cigarro era cousa de dies de fiesta, algo de l que de melhor se le podie dar als cumbidados, assi cumo un copo, un doce ou antramoços nun alçafate. I assi cumo nun se passában ls dies a comer doces ou antramoços, tamien ls cigarros éran cousa pa l un die, a nun ser que un fusse biciado, cousa que era craticada. Ls cigarros éran cousa cara, de ricos, i estes, na eideia de la giente de l’aldé, podien-se dar al luxo de comer doces todos ls dies i botá-le uas fumaças balientes. Dende que ls probes fumássen ne ls dies de fiesta, yá que estes éran ls dies an que ls probes mais se querien aparecer als ricos, al menos naqueilho que para eilhes era l mais amportante, la barriga chena i haber de todo a ringalheira. Para quien nun tubir esta cultura de l cigarro cumo fiesta, chama craba al que andubir a pedir cigarros i nun le passa pula cabeça a naide de andar a dar cigarros als outros. Mas quien tubir la cultura de l cigarro cumo fiesta, esta mete tamien cigarros que se dan a las pessonas, i todos acéitan mesmo que nun séian fumadores. I l cigarro merece respeito, i por esso nun puode ser çtripado assi sien mais nien menos, respeito esse que l miu bezino tiu Jesé Fonso antendie i praticaba bien: á Amadeu, esse cigarro si l bou a aceitar, que ye de ls buonos, mas se tu nun t’amportas, guardo-lo pa l demingo que ben. I reluzien-le ls uolhos anquanto ponie l cigarro atrás l’oureilha, rodando-lo, ameroso, antre ls dedos acastanhados de fumo, calor i calhos. Nunca squecie l dito de agradecer, 'anton, que d’hoije nun anho!' Aqueilha notícia na telbison, que yá habie salido ne ls jornales, era dada cumo un sinal d’atraso daqueilha giente stramuntana, que até pon ls garoticos a fumar, i ye sabido que ls cigarros mátan ls adultos a quantas mais ls pequerricos. Stá bien que ye ua tradiçon que ben de loinge, mas you tamien stou de acordo que hai tradiçones que nun se dében de respeitar. Mas l causo nien ye esso. L que me xateia ye que naide antendiu que l cigarro ye un eilemiento eissencial de la fiesta i que sien el la fiesta nun tornará a ser la mesma. Nun tengo pena que s’acabe, mas custa-me que nun s’antenda i todo agora seia medido pul raseiro dun fundamentalismo antitabaco que deixa a la muostra la cobardie antresseira de las medidas que se tóman: se assi nun fur, anton porque nun se cérran dua beç las fábricas de cigarros? La respuosta bai a quedar para soutordie die.
Amadeu Ferreira
Sem comentários:
Enviar um comentário