(Diário tardiego dun fumador an suspenso 9)
Quien nun fuma nien bebe bino,
lhieba-lo l diabro por outro camino.
(Dito dezideiro mirandés)
Bien berdadeiro ye este dito, anque el sconda ua grande eironie: a la purmeira, parece ser un ancentibo a fumar i/ou a buer, porque un muorre-se de qualqueira maneira, apersentando-se assi cumo regra heidonista; mas tamien parece dezir que l fumar i l buer son cousas de l diabro i portanto son cousas malas a que haberá que rejistir. Seia un lhoubor de l bício de ls fumadores i borrachos, ou seia un meter no einfierno todos ls bícios, este dito mirandés ten essa bantaige de poder serbir para quien ten l bício ou para quien lhuita contra el. Al alrobés de l que diç l Abangeilho, ye possible serbir a dous senhores, neste caso l bício i la bertude, cunsante cada un querga. Nien se puode dezir que esso seia ua cousa nuoba, yá que ls ditos dezideiros cunsíguen essa áfrica de agradar a todo mundo, segredo que ls políticos bien gustarien de saber, mas nun son capazes. A las bezes l mal que faç l fumo de l tabaco ye assi cumo un stado d'alma: nun se sabe se faç bien ou mal, mas hai que ir atrás dessa giente sabida, alguns até son doutores, que diç que faç mesmo mal. You, cumo yá dixe, nun quiero saber deilhes para nada: sou un fumador an suspenso por respeito a las pessonas que bíben cumigo. Assi, l fumar, tornou-se para mi un suonho, que talbeç solo noutra bida, se eisistir, poderei cuncretizar. Essa mie decison nun dependiu, portanto, de l fumo fazer bien ou fazer mal. Talbeç agora quien me lei yá antenda porque me assino no cumo ex-fumador, mas si cumo fumador an suspenso. Até quando bai a durar la suspenson, nien you sei i talbeç nunca l benga a saber: será até que l prazer de fumar se puoda tener cun toda la lhibardade i nó cun mil uolhos anriba de nós cumo subelas; será até que l prazer de fumar puoda ser tenido an sous santuários, i nó an squinas anlhodadas i mal cheirosas, nó an rues fries ou de rechino, nó an lhapos para adonde fúrun scorriçados. I mais me xateia aquel aire de quien mira pa l Senhor de Mezericórdia, todo peneroso, yá que un fumador ye un fraco, nun ten fuorça de buntade para deixar l bício, cuitadico... Se fúran todos a dar ua buolta! Essa ye la cantilena cun que tamien angórdan las bendedoras dessas malzinas que diç que ajúdan a deixar de fumar. Cumo you oubie dezir quando era garotico, an seinha de reprobaçon, «que seia todo por amor de Dius!».
Sem comentários:
Enviar um comentário