De cabeça atada

(Diário tardiego dun fumador an suspenso 10)

A ua cierta altura, fui l oulor que me atou la cabeça al tabaco. Talbeç nun fumara hai mais dun anho i aquel oulor fe l fumo de l cachimbo agarraba-me cumo ua lúria. Acabei por mercar un nua tabacarie de l Rossio i ampecei a fumar tabaco marca Gama. Ácerta, l cheiro era mais prendediço quando benie de l cachimbo de ls outros do que quando benie de l miu. A cierta altura, l cachimbo era mais un passatiempo ne ls anterbalos de ls cigarros. Si, ye berdade, nunca cheguei a deixar mesmo de fumar cigarros. Nunca cumbibi cun un berdadeiro fumador de cachimbo, cun quien trocasse eideias i çcutisse marcas de tabaco ou, até, subre l melhor modo de lhimpar l aparato esse, de l acender, de l fazer durar l mais tiempo possible aceso, alguien cun quien praticar aqueilhes rituales, aqueilha lhiturgie que todo l cachimbar eisige. Se nun fur assi, nun bal la pena. Cul tiempo, uns dous ou trés anhos, talbeç quatro, deixei l cachimbo, sien nunca haber deixado de fumar uas cigarradas. Ls cigarros stában alhi a la mano, yá feitos, era solo acendé-los. Na fin, botaba-se la prisca fuora, mas l cachimbo habie que l lhimpar, cun aquel cheiro de cinza de cigarro detenida, de que nunca gustei. Mas menos inda gustaba de l alperchin que chubir pul cachimbo arriba, assi a modo de borras. Nunca manginei, quando l oulor me prendiu, que todo esso salisse daquel tabaco tan bien cheiroso i daquel aparato que daba un aire assi tan anteletual, de pessona mui sabida i, até, algo fidalga. Inda cheguei a ajuntar ua coleçon de quatro cachimbos, mas nunca merquei aqueilhes aparatos todos para lhimpar, ancalcar i sei alhá que mais. Un desses quatro cuido que inda andará als bolcos por casa. Assi i todo, guardo buonas lhembráncias de las cachimbadas que iba dando. Inda hoije l oulor me ata las narizes, mas tengo de cunfessar que las cachimbadas nunca me soubírun tan bien cumo las cigarradas, anque nun las renegue de l miu passado de fumador. Aquel cierto aire de anteletual de ls fumadores de cachimbo fui cousa que nunca me atraiu. Para mi, todo nunca passou duia question de oulor.