Carrascos hai que yá cientos d'anhos crécen al meio de faias, froles ne l altar de las arribas de l Douro: stan adonde naide le topa i ls uolhos solo ls cunsíguem mirar de ambaixo. An frinchas de piedra arrebéntan bidas que alguien çclarou ampossibles; pula raiç de las faias assóman-se carreirones de grima que giente fizo cun pisagadas de sangre i de gana; pula carreira de l riu stende-se un Adamastor lhargo cumo dies sin pan, faroç cumo delores sin malzina, dua dureç mais que sacho an piçarron. Este Douro quedou mui loinge de ls ambestimientos de l Marqués de Pumbal i nel nun se spelhórun ls solares de ls angleses: fui giente doutra tempra que le fizo dar lheite a sues tetas de piedra i l adominou de picon a picon cun sues guindaletas, giente deixada a la soledade sin fin que solo sous cachones abafában, antes de barraiges ls calháren. Hai quien diga que este ye l Douro probe, mas nó, ye solo l Douro squecido i çpreziado, an que la sue giente até fala ua outra lhéngua que yá cientos de anhos deixou de ser falada por reis i por fidalgos: assi, fazé-lo Património de la Houmanidade iba a dar muito trabalho, que nun ye qualquiera un que l'ampalpa l'alma a este Douro, poucos le dan balor al modo cumo la natureza se sentou eiqui, ancalhada por manos que cun eilha fazírun un casamiento a que agora le cháman Parque, adminando-la, mas deixando-la siempre lhibre. L tiempo fui stendendo sue teç angurriada por faias i picones, curtida na melma de ls sudores, relhuziente nas modas de ls dies lhargos: quedando fui l'ardança, tan grande que solo uolhos cerrados puoden ber.
Sem comentários:
Enviar um comentário