cinco anhos apuis, cuntino cumo quien bai de camino

cinco anhos apuis de haber ampeçado este blogue, l 25 de márcio de 2007, inda porqui bou andando, cumo quien bai de camino, que ye cumo quien diç, rente als dies, nun bolo rastreiro que nun bai alhá l andar; para trás quédan 1587 testos i muita hora delantre la pantalha, que me fúrun amostrando a quien porqui quijo pasar ou até deixar ua palabra: bien háiades pula cumpanha, anque al screbir nunca pense an quien bai a ler, mas solo an quien scribe, you mesmo puis este ye un blogue personal an todos ls sentidos de la palabra; screbimos tamien para nun mos morrermos, para ber se somos capazes de achar mais un cachico de nós i de pouco mais sírben las palabras dun blogue cumo este, dua antensidade de scrita tan grande que solo puode benir de la necidade i se fui tornando muita beç a modo un diário i outras bezes ua biaije als caminos por adonde outros poetas andubírun a quien le dei la ouportunidade de faláren mirandés; deiqui palantre cuntinarei cumo quien bai de camino, deixando cumo lhembráncia l testo cun que ampecei este blogue, l 25 de márcio de 2007:

Quando ua pessona bai por un camino, ye buono ir falando cun alguien, que l camino se anda mais debrebe: ye cumo ua fala que bola, puode ser subre nadas, cousas sien amportança para demudar l mundo i la bida, assi i todo amportantes para ajudas a andar aquel camino.

L dito si diç, «pan i bino ándan camino», mas palabras tamien ándan camino, subretodo ciertos caminos que dá miedo andarmos solicos por eilhes. Quando era garotico, tenerie siete ou uito anhos, miu pai mandaba-me a regar ua huorta para un sítio que le cháman La Derraiada, que quedaba acerca de l riu Douro i habie que passar pul meio de outibales adonde nun s’oubie un germo. Cada rugido, nien que fura dua lagartixa, era cumo un subelon de grima a spertar-se por mi arriba. Mas se sentie alguien, nien que fura bien loinge, parece que l miedo se scamugie i ls uolhos se m’anchában de risa.

Assi, un blog que se chama Cumo quien bai de camino, tamien ye un modo de ir a saber de jolda que querga andar cun nós por este camino, nien que seia solo un cachico. Patricando, que ye l melhor modo de nun star solo. A las bezes até patricamos solo cun nós mesmos, eilusion de que puode haber alguien que mos ouba i yá nun amporta se mos oube ou nó. Por esso, l ato de falar ye un ato de ancantamiento contra la soledade, contra l miedo, contra l squecimiento: mais do que l cuntenido de la fala, amporta l ato de falar el mesmo, pus solo el ye capaç de criar al nuosso lhado alguien que mos ouba, que até podemos ser nós mesmos.

Spero que assi s’antenda bien porquei perciso tanto de patricar nesta mie outra lhéngua, aqueilha que purmeiro oubi quando naci, aqueilha que purmeiro daprendi i, por esso, aqueilha que la bida m’apuntou al centro de l coraçon. Se nun me cunsigo zarredar dessa lhéngua, la culpa, bien bedes, nun ye mie. I cumo stubo tanto anho sien ser screbida, agarrou ua fame de scrita tan grande, tan grande que, por bien que scriba, nun sou capaç de la fartar. Sendo, por esso, un mal sien malzina que le bala, por este i outros caminos l bou atamando cumo puodo.