uas bezes son palabras todo quanto speras
i ls sítios son uocos que nanhue ourbalheira
inche, i las cintas de la raposa que alhá stan
nun las béien ls uolhos nien silbeiras
quédan al modo para anfeitar la lhuna
ou deixar que las modas te chúban
cuorpo arriba l pensamiento redondo
a las buoltas cun el mesmo cumo
un bolo que nunca sal de l sítio
ls dedos yá cansados de aguantar la cabeça
tenes segredos que las cámaras pulas paredes
angúlhen i pides ua nota cumo arrimador
de carros stranho, sfergante an que todo
se figo an auga i las quelores de l die
se sumírun sierra arriba rieiro abaixo
i dar la buolta queda cada beç mais
ampossible ls pies yá zafeitos de andar
l bafo ancapaç yá dun assopro
de ancaixar ls passos nua redaçon
que le traia l sentido roubado talbeç perdido
muorden ls dientes las palabras i tenes
miedo que ua cámara qualquiera las agarre
i te las debuolban an bacinas de silenço i muorte
bolbiste de la muorte i nien un nome traíste
que todo deixeste na barca de Caronte
lhago i fondo ye l riu de l squecimiento
que puode inda sobrar pa ls benideiros dies
se nun sabes l camino cumo ls páixaros
se las alas solo quieres bater al para baixo
i traba nun agarra ne l mar de ls muitos miedos?
deixa chubir la madureç de la lhuç
i todo ferber até que seias capaç de bolber
de las palabras que an florestas de miedos
te tuolhen passos i hounestas risas.
Sem comentários:
Enviar um comentário