segunda-feira, 9 de abril de 2012

ye fame cousa mui séria

Fedieira [cornalheira] a poucos metros la barraije de Picuote.
Retrato de Manuel Ferreira an 7.4.2012



nace de peinha cumo un milagre,
d'ampossibles se manten
i inda le sobra fuorça
para botar sou fuogo de fuolhas
sien que tiempo tenga
para quedar triste i penerosa
de tan dura bida que le calhou.

son las arribas ua tierra de milagres
i tanta cousa eilhi s'aguanta i bibe
que até cultura i lhéngua ban alhá de l tiempo:
haberien de star muortas, yá dezírun;
hai quien le tenga muita rábia a milagres
destes, que agora solo mos queda
cuntinar de gárrias agarradas a la peinha:

ye probe l alimento? mais bal este agora
que manjares pormetidos para nunca;
ye fame cousa tan séria que naide
puode jogar cun eilha sien que las gárrias
sinta, serenas cumo la bida: naide
percisa de lhicença para cuntinar
a bibir, que dreito ha de ser, nó de zinolhos.



2 comentários:

Abelhon disse...

Se até las árboles de las peinhas botan sous galhos al alto, por que ha de un home deixar que l squadrílen?
Siempre las peinhas han de ser sustento de bida i amuostras de milagres.

Marcolino e Mara Cepeda disse...

quando, ne l'alto dua fraga, altaneiro,
nace un subreiro
i bibe,
crece,
cumpre la sue funçon
que ye dar corcha

quando, pendurada naqueilha arriba,
sbraceija,
batida pul bento,
ua bielha figueira
que contra todas las spetatibas
ouferece figos

quando, ls campos ansistentemente berdes,
peijados de pequeinhas flores
beben las orbalhadas manhanas
matan la sede
matan la fame
i, milagrosamente,
me fázen crer

beisico
Mara