domingo, 8 de abril de 2012

pulas arribas i la barraije de Picuote


sali a saber de flores, mas pouco íban alhá
l branco de las scobas, que yá quantá nacírun
ls almendrucos, mas solo achei un jardin d'azedas
i bi l fuogo de las fedieiras a spreitar culas
gárrias de sues raízes spetadas nas peinhas de
las arribas, puis la fame até pan faç de piedras
- perdidos todos ls dreitos inda queda
l dreito de cun todo arrebentar: que dreitos
se puoden eisigir adonde yá nun ls hai?

podie çcrebir la dreitura de las faias i sous
bózios de piedra ou até dezir mal de la edp
ou antoce lhembrar l sangre que quedou ne
ls aliçaces daqueilha presa ou ls barraijistas de
bejita a lhembrar de cumo porqui crecírun,
mas solo me dá para falar de azedas azules
de sequidade, fedieiras spetadas a guilho pulas
peinhas, puis nada le atalanca l camino
a ua gana de bibir que mete miedo a quatro

nun habie águilas pul cielo ou alcaforros
nien se sentie la nuoba poténcia de lhuç
solo abultiában ls ganados de carrascos
de l outro lhado, yá termo de Fornillos,
sien que un pastor se bira, ua canhona,
un funcionairo al menos; chubo a la Prainada
adonde bózian ls freznos culs dedos spetados
acontra l cielo, i que ls diuses se cúiden puis
bózios assi talbeç yá nun spéren por mais cielos

lhímpan yá la frol las cerejeiras, mas ua cerjina
an pie l'auga spera de grinalda las abeilhas
i yá acénden sues roixas belas ls tomilhos
mas drúmen inda an sue amponença
ls castanheiros an Santa Marina de Cércio,
anquanto ua lhegion de citotes sien tiempo
guarda la capielha deixada a sue soledade, mas
yá naide adora esses bielhos diuses de la fecundidade:
nun benirá dende haber tan scassa giente?

stan agora a purparar la guapa casa delantre
l'eigreija de Bilachana, morada de curas: mas
cumo ban a aguantar de pies ua casa sien giente?
a mi gusta me ber l abade Diogo de Teive a
abaixar le las scaleiras, ls uolhos perdidos
acontra l sul que le trouxo l lhargo çterro:
pula cierta nunca eiqui bibiu, mas alguien
puode lhebar a mal que le déiamos casa
i eilhi seia l centro de anterpretaçon de

sue stadie na Tierra de Miranda, essa honra
negra de eiqui se haber strenado l'anquesiçon?




3 comentários:

Almendra disse...

Gustei!
Parecie miesmo que you tamien iba na bejita.
Merecie uns retratos, será que ls puodes meter i poner ne Nordeste?
Era ua ambora antressante.
"Pulas arribas de l Douro Anternacional"
Se nó yá bou a poner ne l HOIJE i arranjo ls retratos!

Marcolino e Mara Cepeda disse...

Olá Amadeu,

Tengo suidades de benir eiqui i perder-me ne ls tous testos, ne ls tous poemas...
Tube giente an casa,l que me dou mui prazer i, claro que quien come milho nun puode assobiar.
Agora que yá se fúrun, bou tentar recuperar l tiempo perdido.

beisico
Mara

Adelaide Monteiro disse...

Lendo, caminei cun bós nesses fraguedos, sigurando-me a fedieiras para nun me rebolcar, arribas abaixo.
Las fedieiras dan-mos ua buona liçon, agarradas a la sue lhéngua calhada, chupando ampossíbles la ceçon de piedras. Tierra de milagres i de bózios que cumbéncen ls ancrédulos, de que de l pequeinho medrando siempre, grande debrebe será.
L riu mira sereno na sue cama fonda i ri-se pal poema que se bai screbindo ne l aire amargoso de l oulor de scobas brancas, acocado debaixo dua gorra basca i mortico por chegar a casa para bolar pal mundo, an sigundos.
Hai siempre mais anspiraçon quando l aire mos assobia an mirandés...
Eiqui na Speciosa, tamien l aire me trai siempre mais letras a stribá-se-me nas bidraças, a suplicá-me lhiberdade.

Un beisico,

Delaide