segunda-feira, 22 de novembro de 2010

L acampamiento



Barracas cun niadas; blocos de casas cun niadas; casernas cun bandos.
L bárrio aparece-se-me a un grande acampamiento.
Todo drume.
Beio la nuite toda, ne l bárrio todo.
An que casas stá Cristo a reinar? An que barracas? La nubrina ye spessa. Quien bei l Senhor?
Inche-me ua gana grande de abraçar l bárrio todo. De beisar las chagas de l bando todo. Las chagas de las lhargas caminadas.
Nunca, cumo hoije, senti l drama sien fin de l acampamiento de las barraiges. Sinto-me de l bando.
Que todo se zarrede a la nuossa passaige.
Nós tenemos que passar.
Cun todos ls nuossos benairos! Cun todos ls nuossos pecados! Culas nuossas poucas bertudes! Cula nuossa alegrie i tristeza! Cula nuossa belocidade de mundiada!
Deixai passar l acampamiento, nesta nuite de nubrina!
25 de janeiro de 1955.

Telmo Ferraz, O Lodo e as Estrelas
Puosto an mirandés por Fracisco Niebro



3 comentários:

ACangueiro disse...

La barraige de Picuote ampeçou inda you nun habera nacido mas la barraige de Bempuosta fui l mesmo. Cumo presenciei todo l que padre Telmo Ferraz diç.
Lhembro-me mui bien de pequeinhas curteilhas de los cochinos arrendadas als barraigistas forradas cun l papel de los sacos de cimento gastos na barraige, un fogaozico a gaç i cun dous metros quadrados bibia ua famílhia de quatro ou cinco.

Tiempos defíceis!

Amadeu disse...

Buonas nuites, Antonho

Tiempos defíceles que bien se me lhémbran.
Ls aldeanos bibien mui mal, mas muitos barraigistas (nien todos) inda bibien pior.
Serie antressante lhembrar esses tiempos.

Abraço

ACangueiro disse...

L mui comentairo até parece que ls aldeanos bibían bien mas nun ye berdade. La bida era defícele para todos mas acho que un pouco mais defícele para ls que benían.
abraço