Son las nuobe.
Capielha de ls Carrascos.
Todo silenço.
L friu assobela-me.
L manto de gilada cunsola-me i lhebanta-me.
La Natureza tembra.
L sol abraça-la.
L fumo de las casas sperta-me.
Ne ls telhados, brancos de carambelo, ampéçan a aparecer manchas scuras - zeros negros.
Ye l fumo.
Beio la corteilha de la Cunceiçon. Paga 60$00 de renda.
Uns dies atrás, bibie alhá un cochino!
Solo ua cama. A la nuite, stende ua manta nas lajas. Deita neilha ls filhos i tapa-los cun l xal.
L suonho de ls Anjos tamien maçca piedras!
Na corteilha, quando l carambelo se derrite, cáien boteiras.
L fumo sal del todo.
Zeros negros!
Sinto, andrento, todo l friu de la nuite.
Dá-me gana de arrebanhar toda la gilada... i, ne l miu punho cerrado, apertar todo l friu de todas las nuites, até la gangrena fazer cair ls mius dedos, nua manhana de sol.
26 de janeiro de 1955.
Telmo Ferraz, O Lodo i as Estrelas
Puosto an mirandés por Fracisco Niebro
Subscrever:
Enviar feedback (Atom)
1 comentário:
Rialidades duras que tamien fázen la stória de la nuossa tierra.
Mui guapo i sentido nesse deseio de agarrar l friu de todas las nuites que alebie las gangrenas de duras bidas.
Bs,
D.
Enviar um comentário