Hai uns dies falaba se na 1.ª páigina dun jornal de bárias pessonas cun muita eidade. Ua deilhas, cun mais de uitenta anhos dezie: sou algo antigo, mas nun sou bielho. I you pregunto: que ten la palabra bielho i sous deribados, cumo belheç, que las pessonas le fúgen cumo tinha? You siempre oubi chamar antigos a las pessonas que yá stan muortas, que bibírun ne l passado.
Quando somos garoticos chega un tiempo an que yá nun aceitamos que mos chámen de garotos, ninos, meninos, crianças, mas esso nun quier dezir que nun lo séiamos. L mesmo se passa cun las pessonas de eidade, que nun acéitan ser bielhos, mas esso nun quier dezir que nun lo séian. Ser bielho nun ye zonra, nien deminuiçon, ye solo ua question de eidade.
Siempre assi fui i ha de cuntinar ser. Antoce Cícero se screbira hoije l sou De Senectute (De la Belheç) tenerie que screbir De Antiquitate (De l'antiguidade)? Nun passa de jogar culas palabras i de mos anganharmos, mas esso ten ua cunclusion mais peligrosa: cumo nun aceitamos ser bielhos, antoce hai que negar que haba bielhos ou hai que ls scunde, l que ye terrible.
Bendo bien, cuido que ua de las percipales seinhas de belheç ye nun aceitar que yá se ye bielho. I nun hai naide mais bielho do quien nega siempre que lo seia ou puoda ser. Neste tiempo an que solo se le dá balor a la mocidade i se busca la malzina de l'eiterna mocidade, la belheç cuntina a eisistir i l pior que mos puode passar ye fazermos de cuonta que nun eisiste. Quando mos benir nun la sabemos recoincer nien sabemos l que le hemos de fazer: puis bielhos nun son ls farrapos, bielhos son las pessonas.
1 comentário:
Ls mius abós, ls quatro, morrírun todos depuis de ls nobenta anhos. Nunca cunsidrei que fússen bielhos, antes pul cuntrairo, cunserbórun la sue dignidade até al fin, pese ambora las sues debelidades própias de l'eidade. Siempre tube mui ourgulho deilhes i de las bidas que custruíran. Nun fúrun bidas fáceles, isentas de sofrimiento. Todos eilhes biran un filho partir antes de tiempo i todos tubírun de subrebibir a essa einorme perda.
Eisiste ua einorme defrença antre nun querer ser bielho i aceitar la sue belheç.
Quando nun se aceita que se ye bielho, nun se cunsegue ser feliç. Bibe-se ne l limiar de l tiempo que se ten i nun se aceita.
Quando se aceita que l tiempo passa i que fui bebido l melhor que se pudo i soube, queda la noçon de l deber cumprido i l'honra de se tener sido quien se fui.
Beisico
Enviar um comentário