Assomadeiros5

Quando se assomaba para andrento, tembraba de le ber l fondo a l'alma. Grimaba-se de la sentir uoca, branca i sien colgadeiro, cristal que le dá un aire por nun aguantar las quelubrinas que chubien por eilha arriba. Quando s'assomou i biu ls dies de manhana a fugir por nada queréren cun eilha, quedou sámbana. Agora achega-se a eilha mesma cumo se fura outra, siempre sien gana de achar la que nun quier, mas ye. Dá-le l mesmo aire als galhos de l'arble, mas nien todos abánan pa l mesmo lhado. Assi le passaba culas airaçadas que le ponien las eideias uas acontra las outras i las malinas a ancarrapitáren-se-le pula salude arriba. I a cada cumpremido que toma, cerra la puorta a la outra eilha mesma que nun quier, mas nun se bai ambora.
Nun hai outros assomadeiros sien fondo, solo ls que dan pa ls andrentos de nós mesmos: ls uolhos pouco béien i la grima bai muito para alhá de las palabras que los dízen.

Fracisco Niebro