Assomadeiro 31

Preguntas cumo me quedou tan fuorte la mimória: que mais me poderie quedar? Miu palácio ye la rue, mius lhibros fuolhas que l outonho silba, mies modas ban i bénen cul aire: a nun ser la mimória, que mais poderie debanar? Por eilha me assomo a mi i al tiempo: que scalada me lhebarie a mies squinas mais slúbias? La mimória ye feita de matéria de silenço: para que haberie de querer mais bózios? Son palabras ls fincones de la mimória: ye por eilhas que abaixo até antes de nacer, quando era arble que sticaba ls galhos al peine de l aire inda berde, daprendediço de las modas que habie de cantar por todo l tiempo. Solo quedórun morgaços de l que fuste? I para quei percisabas de mais mimória, pus glórias mais nun serien que puro anganho? Agarra-te al que recebiste i al que sós, i ampalpa andrento l mundo anteiro: se algo buscas, que séian palabras pa l dezir.