Bai para un anho que stá el solo, l puial, i crécen lhibres, agora, ls bacielhos de las paredes. De las airaçadas quédan morgaços que rebufórun pa la squina, que se fui de beç la mano de l bardeiro. Yá naide reinhe culas andorinas, i ls andorinicos puoden botar sien miedo sous cagados. Naide podou la parreira, mas yá le creciu fuolha i agora un nun se dá de cuonta que nun fui podada. You bien sei que tenemos de mos morrer, mas qualquiera un bei que l puial quedaba melhor cul miu bezino alhá sentado, a remonicar culas moscas i cun todo l que apersentara seinha de bida. Até l perro que s'amonaba ambaixo la lhastra lhebou camárcio. Stá mais frie la piedra, i até quando le bate l sol ten outro rechinar. Tamien you bou quedando mais friu, que yá me faç mal agarrar sol. Inda hai dous anhos éran trés ne l mesmo puial: nunca fúrun giente de çueca i talbeç por esso nun se me lhembre de habéren sido quatro. Bien se stende la tarde quando entra pula nuite, de modo que l scuro mos agarra sin un se dar de cuonta. Bendo bien, quien sabe quando un s'ampeça a morrer?
Subscrever:
Enviar feedback (Atom)
Sem comentários:
Enviar um comentário