Assomadeiro 32

Yá bou quedando rebolo a que l tiempo le fui lhabrando las squinas. Stá acerca l fin de la ribeira. Assi ache un remanso adonde l sol rechine i ceçon nun falte. Quien mirar la lisura de la piel, i admirar la redundeç de l star, que nun s'apréssie: alhá stan ls feitiços de ls bolcos zde l naciente, la friura de las augas, las ronchas de las arenas mais finas, ls silenços de las cencenhadas. L que se bei ye solo zlhumbramiento de ls uolhos agarrados al mundo, ye gana de que la ribeira nunca acabe, de que nunca percise remansos, de que nunca haba rebolo, de que nunca la piedra se gaste a aguçar la gadanha de ls dies.