Assomadeiro 33

Cun este astro, manhana ha de sudar gilada. Lhembras-te de las nubres retrocidas - aqueilho era un delor... - de trasdonte? Bien te dixe que solo poderien dar auga. I la lhuna cun rodaixa al redror, cumo ls santos? Rechino, ye l que ende ben, inda que tarde. Essa cara an que hoije te colgueste nun anúncia dies serenos. Mas nun fagas couso, que destes assomadeiros nun se bei l tiempo de manhana: cumo poderies ber l que inda nun faziste? L que bés pula frincha de ls dies nun sós tu, mas tous quereres, mas tous miedos que píngan cul tiempo. Cumo poderies ber ls passos que nun andubiste? Essas nó, que son pisagadas que te traírun até eiqui: nun bés que miras al para trás!? Bota-te al camino, chube-te, anda-te até la fin de ti, que siempre tu te speras i siempre te cheiras a lhabado. Lhembras-te l die que te busqueste de candela pula rue? Até la tue selombra daba al para trás. Senta-te, serena, i spera que ls uolhos s'houmílden al tiempo, sien lhuç i sien quelor. Quando se t'acendíren ls dedos i te bolares an resfuolgo, ende ye tiempo de sentires l astro que ancarambina ls miedos que sálen nas rebuoltas de l camino. Al meio, se percisares quien t'acuda, bózia por ti.