Assomadeiro 36

Quedas-te para alhá las augas que te manas, lhagona adonde se pérden uolhos i pensar. Habie abaixado la nuite i stában calhados ls páixaros na arble de la squina. Até las palabras, antes aparchacadas pul l silençoo, yá se habien sumido. Nó, l pintor nada ha de pintar, que solo a nadas se poderá assomar, i solo telas brancas le poderan salir de la mano, brancas cumo risas de nun acraditar. Ou talbeç negras, cumo l tiempo, l tiempo fuora del mesmo. Talbeç puoda pintar l que nun se bei i solo quelores i pinzeles cunsíguen adebinar. Claro que apuis naide bai a antender, mas esso ye assi cun todo: mesmo quando cuidamos que antendemos, nun sabemos dezir l que antendemos. Agora, miras la nuite cumo ua ouracion: uas bezes ye l'alma i solo eilha que te colga de ls dies, outras ye l cuorpo i solo el que se t'atrabessa na bida. Nun admira que seias siempre dues pessonas. Pa la muorte nunca para de mos lhebar l'augadeira de l tiempo: mas porquei passar por tantos arressaios, picones, barrancos, faias? L amor, salagre, bai-se rendando cumo un bafo, tecendo la dureç dun siempre nuobo ampeço, cumo l nacer de l sol que, d'anriba la nuite, solo se puode adebinar i desear.