L uoco

Fuste te i quedou un uoco adonde la selombra se anfrisgou: ha de ser meidie quando tornares i eilha scatrapulhará pula tarde afuora. Ls puiales aspéran que ls bengas a regar de fresquidon apuis la séstia, que astanho nun fazírun la fogueira de San Juan pa le scamugir la sarna nin bieno ourbalheira que le lhabara l çurro. Que quieres, esta ye ua era an que l tiempo stá a bolcar para outra era, i nun adelantra: mas, se stubiras alhá, siempre te tenien mais un cachico de respeito, tan scasso anda por ende. Talbeç te háian puosto an pie dua jinela i para seguires l aire pul abanar de las fuolhas, que siempre puodes por el mandar algue rezon s'acauso corrir al modo, a dreitas al Sul: estes dies, bien beio que stá mais alboriçada la squina de todos ls aires, adonde moro i de que naide gusta: mas bou-te a assoprar un segredo que nunca le cuntei a naide, esse aire siempre fuorte fui l modo que achei de mantener l bolo que me lhieba pa la rialiadade que bou lhaboriando, loinge deste fazer de cuonta an que m'anredo i que m'anreda. Sabes bien que un die destes tenemos de purparar la fiesta de ls anhos, mas esso nun passa de azona pa me poderes cuntar las cuontas que nun has calhado que bonde. Talbeç a esta hora tamien steias a subrecenar la çtáncia que te cuorre nas benas, esse modo de l sangre nun ferber a cachon i ls páixaros de ls uolhos nun deixáren bolar ls azules adonde siempre póusan. Yá te falei de l uoco? Ye un porblema l retombo que l aturde, percipalmente a la tarchicha, quando las andorinas rézan l rosairo ne ls filos de l telifone. Por anquanto, bou-le fazendo fiestas a la aritmética, a ber se ls númaros dúran i nun páran de correr pula spina de l tiempo, alhenos al quelubrinar de las horas.